იუსტიციის მინისტრი თეა წულუკიანი ვიზალიბერალიზაციის საკითხს გამოეხმაურა და საქართველოს მოსახლეობას მოუწოდა, საზღვრების გახსნის შემდეგ, ევროპის ქვეყნებში საქართველო არ შეარცხვინონ.
,,ყველანი უნდა ვიყოთ ყურადღებით, რომ როდესაც ევროკავშირთან საზღვარი გაიხსნება, ჩვენ არა მხოლოდ საკუთარი თავი და ოჯახები, არამედ ქვეყანაც არ შევარცხვინოთ“, - აღნიშნა მინისტრმა.
მან პროცესში მონაწილე ყველა სტრუქტურას მადლობა გადაუხადა.
,,რამდენიმე თვეში ჩვენ უკვე იმედი გვაქვს, რომ საზღვრები გაიხსნება და შევძლებთ მოკლევადიანი მიზნებით, იქნება ეს ტურიზმი, საზაფხულო სკოლა, ახლობლების მონახულება თუ უბრალოდ სიახლეების ნახვა, ყოველგვარი რიგების, ვიზების და ბიუროკრატიის გარეშე ვიმოგზაუროთ ევროკავშირის ქვეყნებში" , - განაცხადა თეა წულუკიანმა.
ევროკომისიამ გუშინ საქართველოს მოქალაქეებისთვის ვიზის გაუქმების შესახებ საკანონმდებლო წინადადება ევროპარლამენტს ოფიციალურად წარუდგინა. საქართველოს მოქალაქეებს 90 დღის განმავლობაში შეეძლებათ, შენგენის ქვეყნებში უვიზოდ იმოგზაურონ, თუმცა უვიზო მიმოსვლა ევროკავშირის ქვეყნებში სწავლისა და ლეგალური მუშაობის უფლებას არ გულისხმობს. საქართველოს მოქალაქეები, რომლებსაც ბიომეტრიული პასპორტები გააჩნიათ, ევროკავშირის წევრი ქვეყნების ტერიტორიაზე ბიზნესის, ტურიზმის, ტურისტული ან ოჯახური დანიშნულებით შეძლებენ მოგზაურობას.
