"ბათუმის წყლის" დირექტორი ალექსანდრე მიქელაძე გამოძიების პერიოდში თანამდებობიდან გადადგა. ამის შესახებ განცხადებას რეგიონული განვითარების სამინისტრო ავრცელებს.
უწყების ინფორმაციით, ბათუმის მერმა გიორგი ერმაკოვმა მიქელაძის განცხადება დააკმაყოფილა.
"საქარველოს რეგიონული განვითარებისა და ინფრასტრუქტურის მინისტრი, ნოდარ ჯავახიშვილი, ბათუმში მომხდარ სავარაუდო ინციდენტთან დაკავშირებით, რომელიც კომპანია შპს "ბათუმის წყლის" დირექტორს ალექსანდრე მიქელაძეს უკავშირდება, აჭარის ავტონომიური რესპუბლიკის მთავრობის თავმჯდომარეს არჩილ ხაბაძეს ესაუბრა. მის მიერ მოწოდებული ინფორმაციით, საქმეს იძიებს აჭარის ავტონომიური რესპუბლიკის შინაგან საქმეთა სამნისტრო. რაც შეეხება ალექსანდრე მიქელაძეს, გამოძიებისა და კომპანიის ინტერესებიდან გამომდინარე, მან გამოძიების პერიოდში თანამდებობიდან გადადგომის შესახებ განცხადება გააკეთა. ბათუმის მერმა გიორგი ერმაკოვმა მიქელაძის განცხადება დააკმაყოფილა", - ნათქვამია განცხადებაში.
პრემიერ-მინისტრი გიორგი კვირიკაშვილი ბათუმში მომხდარ ინციდენტს მტავრობის დღევანდელ სხდომაზე გამოეხმაურა. მან განაცხადა, რომ საჯარო მოხელე უნდა იყოს მაგალითი სახელმწიფოებრივი აზროვნების.
„მინდა, გამოვეხმაურო ერთ საკითხს, რომლის თაობაზეც საჯარო სივრცეში ინფორმაცია გაჟღერდა, შემდეგ მე მოვიკითხე ეს საკითხი. თუ არ ვცდები, ეს იყო ბათუმის წყალის ხელმძღვანელის საკითხი და გარკვეული ბრალდებები იმასთან დაკავშირებით, რომ რაღაც შეკამათების შედეგად მოხდა ერთ-ერთი კვების ობიექტისთვის წყლის შეწყვეტა.
მინდა, რეგიონული განვითარებისა და ინფრასტრუქტურის სამინისტროს ვთხოვო, რომ მაქსიმალურად დეტალურად გავერკვეთ ამ საკითხში და საერთოდ, მინდა ვთქვა, რომ ჩვენ უნდა დავამკვიდროთ საჯარო მოხელის ქცევის ძალიან მაღალი სტანდარტი. თუ ეს საკითხი დადასტურდება, მინდა, რომ ამ პიროვნებამ სასწრაფოდ დატოვოს თანამდებობა. აუტანელია და ჩვენ ვერ შევეგუებით იმას, რომ საჯარო მოხელეები საკუთარ თანამდებობას იყენებენ იმისათვის, რომ საკუთარი სურვილები დაიკმაყოფილონ“, - განაცხადა გიორგი კვირიკაშვილმა და საჯარო მოხელეებს მოუწოდა აჩვენონ თავმდაბლობის მაგალითი.
გავრცელებული ინფორმაციით, რესტორანმა „BK“-მ ბათუმში, ბათუმის წყლის დირექტორს ალეკო მიქელაძეს სასურველი მაგიდა ვერ შესთავაზა. ის რესტორნიდან გაბრაზებული წავიდა. რამდენიმე წუთში კი რესტორანს წყლის მიწოდება შეუწყვიტეს. ობიექტმა საკითხზე პროკურატურას მიმართა.
