საქართველოს კულტურისა და ძეგლთა დაცვის სამინისტროს და თბილისის მერიის კულტურული ღონისძიებების ცენტრის მხარდაჭერით, 27 თებერვილიდან 6 აპრილამდე, ვახტანგ ჭაბუკიანის სახელობის ბავშვთა და მოზარდთა თბილისის III საერთაშორისო ქორეოგრაფიული ფესტივალი ჩატარდება. ღონისძიება, საზეიმოდ, 27 თებერვალს ვახტანგ ჭაბუკიანის ბინა-მუზეუმში გაიხსნება, სადაც მოეწყობა სამეცნიერო-შემოქმედებითი კონფერენცია, ასევე შესრულდება საცეკვაო და მუსიკალური ნომრები.

მარტში დაგეგმილია მასტერ-კლასები საქართველოს შოთა რუსთაველის თეატრისა და კინოს სახელმწიფო უნივერსიტეტის სტუდენტებისათვის და შეხვედრები ცნობილ ქორეოგრაფებთან. 1-3 აპრილს, ივანე ჯავახიშვილის სახელობის თბილისის სახელმწიფო უნივერსიტეტის საკონცერტო დარბაზში გაიმართება ვახტანგ ჭაბუკიანის სახელობის ბავშვთა და მოზარდთა თბილისის III საერთაშორისო ქორეოგრაფიული ფესტივალი-კონკურსი კლასიკურ, სახასიათო და თანამედროვე ცეკვებში პროფესიონალ და თვითშემოქმედ კოლექტივებს შორის. ფესტივლის მონაწილეებისათვის, ასევე ჩატარდება მასტერ-კლასები კლასიკურ ცეკვაში და ჰიპ-ჰოპში, სხვადასხვა მუზეუმში უცხოელ სტუმრებს საშუალება ექნებათ დაათვალიერონ ექსპოზიციები, მოეწყობა ექსკურსიები თბილისსა და მის შემოგარენში.

ფესტივალში მონაწილეობას მიიღებენ ადგილობრივი პროფესიონალი და მოყვარული მოცეკვავეები, სახელმწიფო სკოლები და სხვადასხვა სახის კერძო სასწავლო დაწესებულება. აგრეთვე, საქართველოს ეწვევიან აზერბაიჯანის, თურქეთის, და სხვა ქვეყნების კოლექტივები და სოლო შემსრულებლები. ფესტივალი საჩუქარს უკეთებს მიუსაფარ ბავშვთა დღისა და კრიზისული ინტერვენციის ცენტრის ბავშვებს, რომლებიც 3 აპრილს გამართულ კონცერტს უფასოდ დაესწრებიან.

ფესტივალის მიზანია საქართველოში მოღვაწე ყველა ქორეოგრაფიული სახელმწიფო თუ კერძო სკოლის და სტუდიის აღსაზრდელების საშემსრულებლო დონის ამაღლება, საქართველოს ფარგლებს გარეთ მცხოვრები ქართველი და უცხოელი პედაგოგების თავმოყრა, შემოქმედებითი გამოცდილების გაზიარება, ამასთანავე ვახტანგ ჭაბუკიანის ხსოვნის უკვდავყოფა და მისი შემოქმედების პოპულარიზაცია.

ფესტივალის ორგანიზატორია საქართველოს პედაგოგ–ქორეოგრაფთა ასოციაცია. ფესტივალის მხარდამჭერები არიან საქართველოს კულტურისა და ძეგლთა დაცვის სამინისტრო, ქალაქ თბილისის მერიის კულტურული ღონისძიებების ცენტრი, საქართველოს შოთა რუსთაველის თეატრისა და კინოს სახელმწიფო უნივერსიტეტი, საქართველოს ტექნიური უნივერსიტეტი, ივანე ჯავახიშვილის სახელობის თბილისის სახელმწიფო უნივერსიტეტი, ვახტანგ ჭაბუკიანის ბინა-მუზეუმი.