,,ნაციონალური მოძრაობის“ საგარეო ურთიერთობათა მდივანი გიგა ბოკერია მიიჩნევს, რომ ივანიშვილის მთავრობის პირობებში შეუძლებელია ეკონომიკური ვითარება გამოსწორდეს. ეროვნულ ბანკსა და მთავრობას შორის ურთიერთობის შეფასებისას მან ასევე განაცხადა, ხშირად ხდებოდა ეროვნული ბანკის პრეზიდენტზე ზეწოლა.
„ქადაგიძეს რომ გაეკეთებინა ის, რასაც მას თხოვდნენ და შედეგად მუქარას ახორციელებდნენ, ანუ რაც ზოგიერთ ჩვენ მეზობელ ქვეყანაში მოხდა, მაშინ იქნებოდა კიდევ უფრო მძიმე კატასტროფა. თუმცა, ივანიშვილის მთავრობის პირობებში შეუძლებელია ეკონომიკური ვითარება გამოსწორდეს,“ - აცხადებს გიგა ბოკერია.
გიორგი ქადაგიძეს ეროვნული ბანკის პრეზინდეტისა და საბჭოს თავმჯდომარეობის პოსტზე დღეს ვადა ეწურება. 26 თებერვლიდან, საქართველოს ეროვნული ბანკის პრეზიდენტისა და საბჭოს თავმდჯომარის მოვალოებას ვიცე-პრეზიდენტი არჩილ მესტვირიშვილი შეასრულებს.
პროცედურის მიხედვით, საბჭოს ახალი წევრი პარლამენტმა უნდა დაამტკიცოს, მოგვიანებით კი საბჭო ეროვნული ბანკის პრეზიდენტის კანდიდატურას დასამტკიცებლად გიორგი მარგველაშვილს გადაუგზავნის. პარლამენტი ქადაგიძის შემცვლელად სავარაუდოდ, კობა გვენეტაძის კანდიდატურას მხარსდაუჭერს.
