,,ყველა იურისტის კარიერის აპოთეოზად სწორედ უზენაესი სასამართლოს წევრობა ითვლება“, - განაცხადა თავდაცვის მინისტრის მოადგილე ანა დოლიძემ საქართველოს პრეზიდენტის მიერ, მისი საქართველოს უზენაესი სასამართლოს წევრობის კანდიდატად დასახელების შემდეგ. მისი თქმით, მნიშვნელოვანია ახალი, კომპეტენტური კადრების ყოფნა სასამართლო სისტემაში.
"ეს არის პატივი განსაკუთრებით იურისტებისათვის და მოგეხსენებათ ყველა იურისტის კარიერის აპოთეოზად სწორედ უზენაესი სასამართლოს წევრობა ითვლება. მე დაახლოებით ერთი წლის წინ დავბრუნდი საქართველოში სწორედ იმ გამოწვევით, რომ მემსახურა ჩემი სამშობლოსთვის. დღეს როდესაც მიმდინარეობს სასამართლო სისტემის გაჯანსაღების და რეფორმირების პროცესი, ვფიქრობ, რომ მნიშვნელოვანია ახალი, კომპეტენტური კადრების ყოფნა სასამართლო სისტემაში და მე ძალიან დიდი სიამოვნებით ვიღებ ამ შემოთავაზებას. იმედი მაქვს, რომ ჩემი დიდი გამოცდილება გამოადგება სასამართლო სისტემას", - განაცხადა ანა დოლიძემ.
როგორც ცნობილია, ცოტა ხნის წინ პარლამენტმა უზენაესი სასამართლოს მოსამართლეს, ლევან მურუსიძეს შეუწყვიტა უფლებამოსილება. სწორედ ამის გამო გახდა სავალდებულო ახალი კანდიდატისთვის წარდგენა.
"ეს არის ადამიანი, რომელიც წლების განმავლობაში გამოირჩეოდა პრინციპულობით უსამართლობასთან ბრძოლაში, პროფესიონალიზმით, უშიშარი პოზიციით, ერთ-ერთ ყველაზე გახმაურებულ საქმეზე - გირგვლიანის საქმეზე, წინა ხელისუფლების დროს," - განაცხადა გიორგი მარგველაშვილმა.
