საქართველოს პრეზიდენტის ადმინისტრაციის უფროსი გიორგი აბაშიშვილი იმედოვნებს, რომ ეროვნული ბანკის პრეზიდენტის თანამდებობაზე კობა გვენეტაძეს მხარდაჭერა ექნება. მისი თქმით, საქართველოს პრეზიდენტის ადმინისტრაციამ ქვეყნის პირველი პირის დავალებით ყველაფერი გააკეთა იმისთვის, რათა არსებული ეკონომიკური გამოწვევების ფონზე ეროვნული ბანკის საბჭო ყოფილიყო სრულად დაკომპლექტებული.
,,მიღებული იქნა გადაწყვეტილება, რომ საბჭოს თავმჯდომარის არჩევასთან დაკავშირებით პრეზიდენტის მხრიდან წარდგენილი ყოფილიყო კობა გვენეტაძის კანდიდატურა. პარლამენტის ორმა კომიტეტმა მას უკვე დაუჭირა მხარი და არსებულ ვითარებაში - ვერც პოლიტიკური და ვერც ეკონომიკური გამოწვევების ფონზე, ვერ ვხედავ რაიმე ტიპის მიზეზს კანდიდატის მხარდაჭერის უარყოფასთან დაკავშირებით", - განაცხადა აბაშიშვილმა.
დღეს ეროვნული ბანკის მოქმედ პრეზიდენტს გიორგი ქადაგიძეს ეწურება პრეზიდენტობის ვადა. ეროვნული ბანკის პრეზიდენტის თანამდებობის დასაკავებლად კობა გვენეტაძეს პარლამენტის მხარდაჭერა სჭირდება.
