გერმანიის ფედერაციულ რესპუბლიკაში საქართველოს საგარეო საქმეთა მინისტრის, მიხეილ ჯანელიძის ოფიციალური ვიზიტი დაიწყო. პირველი შეხვედრა საქართველოს საგარეო უწყების ხელმძღვანელმა გავლენიან გერმანულ კვლევით ორგანიზაციაში - „გერმანიის საგარეო და უსაფრთხოების პოლიტიკის სამეცნიერო-კვლევითი ცენტრი“ (SWP) გამართა.
მინისტრმა გერმანელ ექსპერტებთან შეხვედრაზე ვრცლად მიმოიხილა საქართველოს მთავრობის საქმიანობის პრიორიტეტები, ქვეყანაში არსებული პოლიტიკური გარემო და სტრატეგიული საგარეო მიმართულებები.
მიხეილ ჯანელიძემ ისაუბრა საქართველოს მთავრობის ძალისხმევაზე ქვეყნის დემოკრატიული განვითარების, ეკონომიკური შესაძლებლობების გაზრდის, ევროპული და ევროატლანტიკური ინტეგრაციის, ასევე რეგიონალური თანამშრომლობის განვითარების მიმართულებით.
გერმანელ ანალიტიკოსებთან შეხვედრაზე საქართველოს საგარეო უწყების ხელმძღვანელმა ისაუბრა საქართველოს მნიშვნელოვან პროგრესზე ევროპული ინტეგრაციის პროცესში და ხაზი გაუსვა ევროკავშირთან თანამშრომლობის გზაზე საქართველოს ხელისუფლების მიერ გატარებულ მთელ რიგ რეფორმებს, რაც ქვეყანაში დემოკრატიული პრინციპების განმტკიცებას ემსახურება.
მიხეილ ჯანელიძემ ხაზი გაუსვა ვიზალიბერალიზაციის პროცესის წარმატებით დასრულების მნიშვნელობას. მისი განცხადებით საქართველომ ვალდებულებები გადაჭარბებით შეასრულა და უვიზო რეჟიმის ამოქმედება ძალზედ მნიშვნელოვანია, როგორც საქართველოს მოქალაქეებისთვის, ასევე იმ შესაძლებლობების სრული გამოყენებისთვის, რასაც საქართველოს ევროკავშირთან დაახლოება, კერძოდ კი თავისუფალი ვაჭრობის რეჟიმი იძლება.
მინისტრმა ყურადღება გაამახვილა თავისუფალი სავაჭრო რეჟიმის იმპლემენტაციის პირველად შედეგებზე, რაც ევროკავშირთან სავაჭრო ბრუნვის გაზრდით და ევროპული ბიზნესის საქართველოთი დაინტერესებით გამოიხატა.
მიხეილ ჯანელიძემ გერმანელ ექსპერტების მიაწოდა ინფორმაცია პრემიერ-მინისტრის ინიცირებული რეფორმების პროექტის შესახებ, რაც მიზნად ისახავს საქართველოში ბიზნეს და საინვესტიციო გარემოს კიდევ უფრო გაუმჯობესებას. ამ მხრივ საგადასახდო, მმართველობისა და განათლების მიმართულებით საუკეთესო საერთაშორისო გამოცილების გაზიარებას.
რეგიონის ქვეყნებთან თანამშრომლობაზე საუბრისას განსაკუთრებული ყურადღება დაეთმო საქართველოს სატრანზიტო შესაძლებლობებს და ქვეყნის აქტიურ ჩართულობას სამხრეთ ენერგეტიკული და სატრანსპორტო დერეფნის განვითარების პროცესში, რაც ზრდის საქართველოს სტრატეგიულ მნიშვნელობას, როგორც ევროპისთვის, ასევე აზიასა და მთლიანად რეგიონისთვის.
გერმანელ ექსპერტებთან შეხვედრაზე მინისტრმა ასევე ისაუბრა ამერიკის შეერთებულ შტატებთან სტრატეგიულ თანამშრომლობაზე. საქართველოს ნატო-ში ინტეგრაციის პროცესზე, ჩრდილოატლანტიკურ ალიანსთან თანამშრომლობის არსებულ ფორმატებზე, ვარშავის სამიტის მოლოდინებზე.
მან კვლევითი ცენტრის წარმომადგენლებს ასევე მიაწოდა ინფორმაცია რუსეთთან ურთიერთობის საკითხზე. მიმოიხილა საქართველოს ოკუპირებულ რეგიონებში არსებული ვითარება და ხაზი გაუსვა საერთაშორისოს საზოგადოების აქტიურ ჩართულობას, როგორც კონფლიქტის მშვიდობიანი მოგვარების, ასევე რუსეთის ფედერაციის მხრიდან შემდგომი ანექსიური ნაბიჯების პრევენციის კუთხით.
საქართველოს საგარეო საქმეთა მინისტრი გერმანიაში ოფიციალური ვიზიტით 23-26 თებერვალს იმყოფება. ვიზიტის ფარგლებში მიხეილ ჯანელიძე შეხვედრებს გამართავს მის გერმანელ კოლეგასთან, ფრანკ-ვალტერ შტაინმაიერთან, გერმანიის ეკონომიკისა და შინაგან საქმეთა სამინიტროებში, გერმანიის ბუნდესტაგში, ანალიტიკურ ცენტრებში. ვიზიტის ფარგლებში მინისტრი შეხვდება გერმანიის ბიზეს წრეების და მედიის წარმომადგენლებს.
