უკრაინის რადას ფრაქცია "სამოპომოშმა" პრემიერ-მინისტრის პოსტზე წარსადგენად მიხეილ სააკაშვილის კანდიდატურაზე იმსჯელა. უკრაინული მედიის ცნობით, ამის შესახებ ფრაქციის ხელმძღვანელის მოადგილე ეგორ სობოლევმა განაცხადა.
"ფრაქციაში განვიხილეთ სამი კანდიდატურა პრეზიდენტისთვის, "სახალხო ფრონტისთვის", კოალიციის სხვა კოლეგებისთვის წარსადგენად. ამ კანდიდატებიდან ორი უცხოელია, მესამე კი მიხეილ სააკაშვილია, რომელსაც უკრაინის მოქალაქეობა აქვს მიღებული", - განაცხადა სობოლევმა.
ფრაქცია "სამოპომოშმა" მმართველი კოალიცია 18 თებერვალს იმის გამო დატოვა, რომ უმაღლესმა რადამ პრემიერ-მინისტრი არსენი იაცენიუკი ვერ გადააყენა. ცოტა ხნის წინ მიხეილ სააკაშვილმა განაცხადა, რომ უკრაინაში მისი ამბიციები გაცილებით უფრო მაღალია, ვიდრე "პრემიერ-მინისტრის პოსტი".
