ფრაქციამ ,,თვითდახმარება“ მმართველი საპარლამენტო კოალიცია "ევროპული უკრაინას" დატოვების შესახებ განაცხადა. ამან კი მმართველი საპარლამენტო კოალიციის დაშლა გამოიწვია. ,,ბიბისის“ ინფორმაციით, ამ გადაწყვეტილებამ საპარლამენტო კოალიციაში საჭირო 226-ზე ნაკლები დეპუტატი დარჩა.
ფრაქცია "თვითდახმარებაში" განაცხადეს, რომ შეუძლებელია იმ პოლიტიკურ ძალებთან კავშირი, რომლებიც "პარლამენტში ოლიგარქიული გადატრიალების მონაწილეები გახდნენ".
"თვითდახმარება" რიგით მესამე პარტია გახდა, რომელმაც მმართველი კოალიცია დატოვა. გუშინ პრემიერ-მინისტრ არსენი იაცენიუკის თანამდებობაზე დარჩენის გასაპროტესტებლად ანალოგიური გადაწყვეტილება იულია ტიმოშენკოს "ბატკივშინამ" მიიღო.
გასული წლის სექტემბერში კი, მმართველი კოალიცია ოლეგ ლიაშკოს რადიკალურმა პარტიამ დატოვა.
პრემიერ-მინისტრმა არსენ იაცენიუკმა ,,თვითდახმარების“ გადაწყვეტილებას უპასუხისმგებლო გადაწყვეტილება უწოდა. ,,ახლა სიტუაცია კიდევ უფრო დამძიმდა, ამიტომ ყველამ უნდა დავივიწყოთ წარსული წყენა და ავიღოთ პასუხისმგებლობა ქვეყნის ბედზე. ჩემი ხელი გაწვდილია პოროშენკოსა და მისი ფრაქციის მიმართ“, - განაცხადა იაცენიუკმა, რომელიც გასულ დღეებში გადაყენებას გადაურჩა.
