ცენტრალური საარჩევნო კომისიის ინფორმაციით, გარდაბანში მიმდინარე არჩევნებზე უმნიშვნელო პროცედურული ხარვეზები დაფიქსირდა. 12:00 სთ-ის მდგომარეობით ამომრჩეველთა აქტივობა მედიას ცესკოს სპიკერმა ანა მიქელაძემ გააცნო და აღნიშნა, რომ მოცემული დროისთვის აქტივობამ 11% შეადგინა. მისივე თქმით, გარდაბანში ამომრჩეველთა საერთო რაოდენობა 71, 847-ია.
„მხოლოდ ერთეულ შემთხვევებში დაფიქსირდა უმნიშვნელო პროცედურული ხარვეზები, რასთან დაკავშირებითაც დაიწერა რამდენიმე საჩივარი. ამ ეტაპზე ტექნიკური ხარვეზების უმრავლესობა აღმოფხვრილია“, - აღნიშნა მიქელაძემ.
მისივე თქმით, ცალკეული უბნებიდან შემოვიდა ინფორმაცია, დამკვირვებლების მხრიდან მცდელობაზე, ზეგავლენა მოახდინონ საუბნო საარჩევნო კომისიების წევრებზე
„მოვუწოდებთ დამკვირვებლებს არ ჩაერიონ კომისიების მუშაობაში და ხელი შეუწყონ საარჩევნო პროცესის კანონის შესაბამისად წარმართვას“, - განაცხადა მიქელაძემ.
გარდაბნის საარჩევნო ოლქში ორი კანდიდატია რეგისტრირებული: ბლოკ "ერთიანი ნაციონალური მოძრაობიდან" ბესიკ კახაბრიშვილი, ხოლო "ქართული ოცნებიდან" გოჩა ჯამარაული.
