„ჯიპიაი ჰოლდინგი“ ჯანდაცვის მინისტრის დავით სერგეენკოს მიერ დღეს გამოთქმულ კრიტიკას ეხმაურება. ჰოლდინგის მიერ გავრცელებულ განცხადებას ,,ჯი-ეიჩ-ენი“ უცვლელად გთავაზობთ:
,, „ჯიპიაი ჰოლდინგი“ ოფიციალურად ეხმაურება შრომის, ჯანმრთელობის და სოციალური დაცვის მინისტრის ბატონ დავით სერგეენკოს მიერ გაკეთებულ განცხადებას, რომ „ჯიპიაი ჰოლდინგი“ თითქოსდა თავს არიდებს მის მიერ ნაკისრი ვალდებულებების შესრულებას ვანის რაიონში კლინიკის რეაბილიტაციასთან დაკავშირებით.
წუხილს გამოვთქვამთ, რომ არასწორი კომუნიკაციის გამო დღეს გავრცელდა „ჯიპიაი ჰოლდინგის“ რეპუტაციისთვის შეუფერებელი განცხადებები.
გვინდა განვაცხადოთ, რომ „ჯიპიაი ჰოლდინგი“ ერთ-ერთი ლიდერი იყო იმ კომპანიათა შორის, რომელიც ჩართული იყო ე.წ. უმწეოთა დაზღვევის პროექტში 2007-2012 წწ. და ამ პროგრამის ფარგლებში სოლიდური ინვესტიცია განახორციელა ჰოსპიტალური ინფრასტრუქტურის მოწყობის მიზნით, კერძოდ: 16 კლინიკის მშენებლობა-რეაბილიტაცია საქართველოს რეგიონებში. კლინიკების ოპერირებას ახორციელებს „ჯიპიაი ჰოდლინგის“ შვილობილი კომპანია „ჯეოჰოსპიტალსი“, რომლის ქსელში ყოვედღიურად ათასობით პაციენტი იღებს მაღალი ხარისხის სამედიცინო მომსახურეობას. არსებული პროექტის ფარგლებში განხორციელდა 30 მილიონ ლარზე მეტი ინვესტიცია, საიდანაც დიდი ნაწილი პირდაპირი უცხოური ინვესტიციის სახით მოზიდული იქნა „ჯიპიაი ჰოლდინგის“ აქციონერის, ევროპის წამყვანი სადაზღვევო კომპანიის, „ვენის სადაზღვევო ჯგუფის“ მიერ.
2012 წლის შემდეგ, ე.წ. უმწეოთა დაზღვევის პროგრამაში შევიდა ცვლილებები, რის გამოც უწყებათაშორის კომისიასთან შედგა მოლაპარაკება - მაღალმთიან რეგიონებში არსებული არარენტაბელური კლინიკების სახელმწიფოს მიერ გამოსყიდვის თაობაზე. ამავე შეთანხმების ფარგლებში „ჯიპიაი ჰოლდინგის“ შვილობილ კომპანიას, „ჯეოჰოსპიტალს“ დაეკისრა გარკვეული დამატებითი ვალდებულებები, კერძოდ საგარეჯოს, სამტრედიის, ჭიათურის, გარდაბნის, მარნეულისა და ვანის რაიონებში საწოლფონდის გაფართოება, ამბულატორიების რეაბილატიცა და ა.შ. ამ ვალდებულებათაგან უდიდესი ნაწილი შესრულებულია - მაგალითად ჭიათურასა და სამტრედიის რაიონებში, ხოლო სხვა რაიონებში გეგმაზომიერად მიმდინარეობს სარეაბილიატაციო თუ სხვა სახის სამუშაოები - რასაც ადასტურებს სამინისტროს მონიტორინგის ჯგუფის შესაბამისი ოქმებიც.
რაც შეეხება კონკრეტულად ვანის რაიონს, აქაც არსებული შენობის რეაბილიტაცია მიმდინარეობს და სამუშაოები დროულად დასრულდება. „ჯიპიაი ჰოდლინგს“ არსად განუცხადებია ოფიციალური უარი ამ ვალდებულების შესრულებაზე.
კიდევ ერთხელ ხაზს ვუსვამთ იმას, რომ ჩვენს მიერ ნაკისრი ვალდებულებები შესრულდება მითითებულ ვადებში და ჩვენ, როგორც ევროპული სადაზღვევო ჯგუფის წარმომადგენლები და განვითარებაზე ორიენტირებული კომპანია, კიდევ ერთ მნიშვნელოვან წვლილს შევიტანთ ქვეყნის ჯანდაცვისა და სოციალური სისტემების გაუმჯობესებაში.
იმედს გამოვთქვამთ, ურთიერთთანამშრომლობის პროცესის გაუმჯებესება ხელს შეუწყობს ჰოსპიტალური სექტორის რეაბილიტაციის პროცესის დროულად და ადეკატურად დასრულებას“, - ნათქვამია განცხადებაში.
შრომის, ჯანმრთელობისა და სოციალური დაცვის მინისტრი, დავით სერგეენკო სადაზღვეო კომპანია "ჯიპიაის" "არასერიოზული და უპასუხისმგებლო" დამოკიდებულებით გაოცებულია. დავით სერგეენკო ჟურნალისტებთან საუბარში ვანის საავადმყოფოსთან დაკავშირებით შექმნილ ვითარებას გამოეხმაურა, სადაც საუბარია იმაზე, რომ "ჯიპიაიმ" ვერ შეასრულა ვალდებულება.
სერგეენკოს განცხადებით, ვანის საავადმყოფოს ინფრასტრუქტურა მართლაც სავალალო მდგომარეობაშია.
"ჩვენ რაც მოვახერხეთ, ჩავატარეთ მინიმალური კოსმეტიკური რემონტი იმის გამო, რომ ის შენობა იპოთეკით არის დატვირთული და საკმაოდ რთული ქონებრივი დავებია. ჩვენ წელიწადნახევარი დავუთმეთ იმას, რომ სადაზღვევო კომპანიებთან, მათ შორის "ჯიპიაისთან" სამართლიანი და პარტნიორული ურთიერთობა გაგვემყარებინა კონკრეტული ნაბიჯებით. ეს ნაბიჯები გადადგმულია და შესრულებულია ჩვენი მხრიდან.
ჩემთვის მართლაც გასაოცარი იყო ასეთი არასერიოზული და უპასუხისმგებლო დამოკიდებულება "ჯიპიაისგან", რომლის მინიმალური ვალდებულება იყო ამ პროექტის დასრულება. მათ უბრალოდ შემოგვითვალეს, რომ გადაიფიქრეს ამის გაკეთება“, - განაცხადა მინისტრმა.
