ადამიანის უფლებათა საპარლამენტო კომიტეტის თავმჯდომარე ეკა ბესელია აცხადებს, რომ დაელოდება პროკურატურის შედეგებს და თუ საჭიროს ჩათვლის, ალეკო ელისაშვილის სისხლის სამართლის პასუხისგებაში მიცემას გეგმავს. მისი თქმით, ,,ელისაშვილი თუ ვინმე სხვა, იქნება მაგალითი იმისა, თუ როგორ უნდა აგონ პასუხი საკუთარი განზრახ ცრუ ბრალდებებისთვის“.

ბესელია ასევე გამოეხმაურა დღეს გავრცელებულ ინფორმაციას, რომელიც "კოკაინის საქმეზე" მსჯავრდებული ანასტასია ზაუტაშვილის შვილის სახელით მიმოწერას შეეხება. მისი თქმით, დღეს მალევე დადასტურდა რომ ეს არის სიცრუე. 
"მე ვფიქრობ, რომ ეს ყველაფერი ჩვენ პოლიტიკურ ოპონენტებს უკავშირდება. ისინი ქმნიან ყალბ ჯგუფებს. მათ შორის, ჩემი სახელითაც მინიმუმ 30 გვერდია შექმნილი სოციალურ ქსელში. ასეთი გადაუმოწმებელი ინფორმაციის გავრცელება არღვევს ეთიკურ სტანდარტებს. ამაში ბრალს ვდებ "ნაციონალურ მოძრაობას" და იმ ჯგუფებს, რომლებიც მათთან ერთად არიან", - განაცხადა ბესელიამ.

იგი ასევე უარყოფს ელისაშვილის იმ განცხადებას, რომლის მიხედვით მას, ე. წ. შეწყალების საქმეზე პროკურატურა ინფორმაციას ინტენსიურად აწვდის.
"ვაიძულოთ პოლიტიკოსები საკუთარი შეფასებების დროს კონკრეტულ ფაქტებზე ისაუბრონ. ელისაშვილი არის ჩამოყალიბებული ფლიდი, რომელიც განზრახ აკეთებს ამ ყველაფერს", - განაცხადა დეპუტატმა.