კიოლნში განხორციელებული სექსუალური ძალადობისა და თავდასხმების გამო შეშფოთება გერმანიის კანცლერმა გამოთქვა. ანგელა მერკელი ქალაქის მერს, ჰენრიეტა რეკერს უკვე დაუკავშირდა და მომხდარზე სასწრაფო რეაგირებისკენ მოუწოდა. კანცლერი პირობას დებს, რომ ძალადობის აქტები უმოკლეს ვადაში იქნება გამოძიებული და მოძალადეები კანონის მთელი სიმკაცრით დაისჯებიან. ახალი წლის ღამეს კიოლნის რკინიგზის ვაგზლის ტერიტორიაზე სექსუალური ძალადობისა და თავდასხმების მსხვერპლი 90-მდე ქალბატონი გახდა. რამდენიმე მათგანის ჩვენებით, თავდამსხმელები მიგრანტები იყვნენ, რასაც კიოლნის პოლიცია ჯერჯერობით არ ადასტურებს.
