საქართველოში ამერიკის ელჩი იან კელი აცახებს, რომ ტელევიზიის უფლებაა გააჟღეროს რომელიმე პოლიტიკური ჯგუფის მოსაზრებები, თუმცა პასუხი ამაზე მენეჯმენტის შეცვლა არ უნდა იყოს.
,,მათ უფლება აქვთ, გააჟღერონ ის მოსაზრებები, რომლებიც შესაძლოა, გამოხატავდეს თუნდაც ნაციონალური მოძრაობის ინტერესებს. გულახდილად გეტყვით - ამერიკაში გვაქვს სატელევიზიო არხები, რომელთა ყურების შედეგად ლამის გულის შეტევა მივიღო ხოლმე. მაგალითად, ვერ ვუყურებ "რაშა თუდეის". თუმცა პასუხი ამაზე არ არის მენეჯმენტის შეცვლა, პასუხი ღია კონკურენციაა”, - განაცხადა ელჩმა ,,კვირის პალიტრასთან“ ინტერვიუში.
მისივე თქმით, ,,ტელევიზიის ჩაჩუმების“ საბაბი ფარულ ჩანაწერებში გაჟღერებული საფრთხეებიც არ უნდა გახდეს.
,,რაც შეეხება უკანონო მოსმენების შედეგად მიღებულ ინფორმაციას, რთულია იმის თქმა, რამდენად რეალურია ეს... მესმის, [რომ მხარეებმა დაადასტურეს საუბრის ავთენტურობა] და მიუღებელია ისეთი შინაარსის განცხადებები, რომლებიც შეიძლება შეიცავდეს მოწოდებას ძალადობისკენ. ამის ადგილი არ არის დემოკრატიულ საზოგადოებაში. ეს კატეგორიულად მიუღებელია. რაც ითქვა ოდესასა და თბილისში, თუ ამაში მთავრობა ხედავს ძალადობის გეგმას, რასაკვირველია, მას აკისრია საზოგადოების დაცვის უზრუნველყოფის ვალდებულება და მან ეს უნდა გააკეთოს. თუმცა რამე ხერხებით ტელევიზიის ჩაჩუმება გამოსავალი არ არის. ნათლად მინდა აღვნიშნო - ამას ვეუბნები როგორც მთავრობის, ისე ოპოზიციის წარმომადგენლებს. საკვანძო საკითხია არჩევნები. ყველას ყურადღების ქვეშ უნდა იყოს ერთი რამ - იმის უზრუნველყოფა, რომ არჩევნები ჩატარდეს სამართლიან და ლეგიტიმურ გარემოში”, - აღნიშნა იან კელიმ.
