ევროკავშირის ზოგად საქმეთა საბჭომ საქართველოსთან ასოცირების შესახებ მოლაპარაკებების დაწყებისთვის საჭირო მანდატი დაამტკიცა. ამის შესახებ საქართველოს საგარეო საქმეთა მინისტრის მოადგილე ნინო კალანდაძემ დღეს გამართულ პრესკონფერენციაზე განაცხადა.
"საგარეო საქმეთა სამინისტრო მიესალმება საქართველოსთან ასოცირების შესახებ მოლაპარაკებების დაწყებისთვის საჭირო დირექტივების დამტკიცებას. საბჭოს, სადაც აღნიშნული დოკუმენტი დამტკიცდა ესპანეთის საგარეო საქმეთა მინისტრი მიგელ ანხელ მორატინოსი ხელმძღვანელობდა. ასოცირების შესახებ შეთანხმება არსებულ პარტნიორიბისა და თანამშრომლობის შესახებ შეთანხმებას ჩაანაცვლებს, რომელიც საქართველოსა და ევროკავშირს შორის ურთიერთობის მნიშვნელოვნად გაღრმავებას ითვალისწინებს, ასევე დაისახება თანამშრომლობის პრიორიტეტული მიმართულებები" - განაცხადა კალანდაძემ.
მისივე შეფასებით, აღნიშნული შეთანხმება საქართველოს ევროკავშირთან პოლიტიკური ასოცირებისა და ეკონომიკური ინტეგრაციის შესაძლებლობას მისცემს, რასაც 2009 წლის 7 მაისს "აღმოსავლეთ პარტნიორიბის" პრაღის სამიტის ერთობლივი დეკლარაციაც ითვალისწინებს.
ამასთან როგორც სააგრეო უწყებაში განმარტავენ, ზოგად საქმეთა საბჭომ ასევე მიიღო გადაწყვეტილება საქართველოსთან რიგ პრიორიტეტულ სფეროებში თანამშრომლობის ახალი ქვეკომიტეტები გააარსოს.
