პარლამენტის თავმჯდომარის, დავით უსუფაშვილის ცნობით, საგარეო და უსაფრთხოების საკითხებში ევროკავშირის უმაღლეს წარმომადგენელთან, ფედერიკა მოგერინთან გამართულ შეხვედრაზე აღინიშნა, რომ საქართველოსა და ევროკავშირს შორის ურთიერთობა დაგეგმილი ტემპით და დაგეგმილი მიმართულებებით გრძელდება.
საქართველოს პარლამენტის თავმჯდომარე მოგერინს ქართველ დეპუტატებთან ერთად დღეს შეხვდა. მოგვიანებით კი, კომენტარი მხოლოდ დავით უსუფაშვილმა გააკეთა.
სპიკერის ცნობით, შეხვედრა ძალიან სასარგებლო და სასიამოვნო იყო, ვინაიდან მხარეებმა საქართველო-ევროკავშირის ურთიერთობის პრაქტიკულად ყველა ასპექტი გაიარეს - უსაფრთხოების თემებიდან დაწყებული, ვიზა-ლიბერალიზაციის პროცესით დასრულებული.
უსუფაშვილის ინფორმაციით, ყველა ამ მიმართულებით მნიშვნელოვანი პროგრესი აღინიშნა და ითქვა, რომ საქართველოსა და ევროკავშირს შორის ურთიერთობა დაგეგმილი მიმართულებებით გრძელდება.
„ჩვენ ამ ყველაფრიდან სულ უფრო და უფრო უკეთესი ახალი ამბები შეიძლება გავიგოთ. ჩვენ საუბარი რეგიონული უსაფრთხოების საკითხებზე გვქონდა, სადაც ჩვენთვის განსაკუთრებით სასიამოვნო იმის მოსმენა იყო, რომ მოგერინი სათანადოდ არა მხოლოდ საქართველოს უსაფრთხოების საკითხებს ხედავს, არამედ საქართველოს როლს რეგიონში უსაფრთხოების სისტემის აწყობისა და განვითარების თვალსაზრისით“, - აცხადებს უსუფაშვილი.
სპიკერის განცხადებით, შეხვედრაზე საუბარი შეეხო იმ ახალ ტენდენციებს, რაც სამხრეთ კავკასიაში შეინიშნება. კერძოდ ჩინეთისა და ირანის სახით.
„მოგერინი ირანთან მოლაპარაკებების პროცესში უშუალოდ იყო ჩართული და მას დიდი სურვილი აქვს, რომ სათანადოდ არა მხოლოდ მოლაპარაკებები დასრულდეს, არამედ მისი შემდგომო პროცესი. ამიტომ, ახალ ვითარებაში ჩვენი როლი განსაკუთრებით მნიშვნელოვანია. ჩვენ კმაყოფილები შევნიშნეთ, რომ საქართველოს როლი რუსეთიდან მომდინარე საფრთხეების განეიტრალებაში, ასევე ძალიან მნიშვნელოვანია. ასე, რომ საქართველო უსაფრთხოების უზრუნველსაყოფად არა მხოლოდ თავად ითხოვს დახმარებას, არამედ საქართველო მზად არის, სერიოზული წვლილი შეიტანოს რეგიონული უსაფრთხოების სისტემის აწყობაში და ევროკავშირის უმარლესი წარმომადგენლის მხრიდან ამ საკითხის სწორედ ასე დანახვა ძალიან იმედის მომცემია მომავალი თემებისთვის“, - აღნიშნავს სპიკერი.
უსუფაშვილის თქმით, საქართველოს სჭირდება არა მხოლოდ თავისუფლება განსხვავებულობის გამოხატვაში, არამედ განსხვავებულობული აზრების შეჯერება.
„ეს ყველა საკითხს ეხება, მათ შორის, სასამართლო სისტემას, მედიას, თვითმმართველობას და პარლამენტს. ვიცით, რომ წინ კიდევ ბევრი გზა გასავლელი გვაქვს, მაგრამ მიმართულება რომ სწორია და პროგრესი რომ სახეზეა, ამაზე ყველა ვთანხმდებით. ამ შემთხვევაში, ევროკავშირი და პარლამენტის წარმომადგენლები“, - დასძინა უსუფაშვილმა.
ფედერიკა მოგერინი თბილისს დღეს ეწვია და ის ქვეყნის მაღალი თანამდებობის პირებთან შეხვედრებს გამართავს.
