,,ქართული ოცნების“ ყოფილი მრჩეველი, კოლუმბიის უნივერსიტეტის პროფესორი ლინკოლნ მიტჩელი აცხადებს, რომ რთულია ვინმემ დაიჯეროს ურთმელიძეს გადაწყვეტილება დამოუკიდებლად მიეღო.
ამერიკის ხმასთან საუბარში მან ასევე განაცხადა, რომ იმის გათვალისწინებით, რაც ხელისუფლებას უთქვამს მედიასთან დაკაშირებით და კონკრეტულად, რუსთავი 2-ის შესახებაც, მოსამართლის გადაწყვეტილება ეჭვებს აჩენს.
,,ისეთი ტიპის ქვეყანაში, როგორიც საქართველოა, სადაც მუდმივად დგას კანონის უზენაესობის პრობლემა და სასამართლო გადაწყვეტილებების შესახებ კითხვები ჩნდება, ბუნებრივია, ამ კონკრეტულ სასამართლო გადაწყვეტილებაზეც გაჩნდება კითხვები. შეიძლება ვიღაცამ თქვას, რომ იცით, ეს სასამართლოა და ეს მისი გადაწყვეტილებაა, თუმცა არა მგონია ვინმეს ბოლომდე სჯეროდეს ამის. იმის გათვალისწინებით ან მას მერე, რაც ხელისუფლებას უთქვამს მედიასთან დაკაშირებით, ისევე როგორც კონკრეტულად, რუსთავი 2-ის შესახებ, რთულია, ვინმემ დაიჯეროს, რომ ეს გადაწყვეტილება სასამართლომ დამოუკიდებლად მიიღო და რომ არ იყო რაიმე ტიპის ზეწოლა პრემიერისგან ან ყოფილი პრემიერისგან. ეს ძალიან პრობლემატური იქნება საქართველოსთვის. რა თქმა უნდა, ეს არ ნიშნავს იმას, რომ ქართული ოცნება დიქტატურას ამყარებს ან ნაციონალების მსგავსები არიან და მათსავით ცუდად იქცევიან. ქართული ოცნება ხელისუფლებაში მოვიდა იმ პირობით, რომ დემოკრატიული პროცესების განვითარებას შეუწყობდა ხელს. ამიტომ, ეს ძალა უნდა დარჩეს ხელისუფლებაში და გააგრძელოს ეს საქმე”, - განაცხადა ლინკოლნ მიტჩელმა.
