რეგიონული განვითარებისა და ინფრასტრუქტურის მინისტრი ნოდარ ჯავახიშვილი რუსთავი 2-თან დაკავშირებით "ფრიდომ ჰაუსის" შეფასებას ეხმიანება და აცხადებს, რომ ვერ გაიგო რა უნდა ქნას ხელისუფლებამ, როდესაც ადამიანი სასამართლოში ჩივის.
მისი თქმით, სავარაუდოდ, საერთაშორისო ორგანიზაციებმა არ იციან რაზეა საუბარი.
"როგორც ჩანს, მათ არ იციან რაზეა საუბარი. მე კიდევ ერთხელ გეუბნებით - რამდენი ხანია, მიდის ეს საკითხი და ვერავინ გამცა პასუხი. რა გინდათ, სამართლიანობა არ უნდა აღდგეს? ადამიანი თუ ჩივის, სასამართლომ არ განიხილოს ეს საკითხი? ვის რა უნდა, გამაგებინეთ, "ფრიდომ ჰაუსია" ეს, თუ რუსთავი 2 ? თუ მოქალაქემ ვიჩივლე და სასამართლომ არ განიხილოს? მაპატიეთ, მე სულ არ ვიცოდი, ყარამანაშვილებისაა ეს რუსთავი 2, თუ ვისი და საქართველოს მოსახლეობის უმრავლესობამ არ იცის ეს. სხვა ტელევიზიებში როგორ არის, არ იცვლებიან დამფუძნებლები?" - განაცხადა ნოდარ ჯავახიშვილმა და დასძინა, რომ ,,ჰკითხეთ ,,ფრიდომ ჰაუსს” რა ქნას სახელმწიფომ, როდესაც მოქალაქე სასამართლოში ჩივის“.
საერთაშორისო ორგანიზაცია "ფრიდომ ჰაუსის" ვიცე პრეზიდენტი რობერტ ჰერმანი მიიჩნევს, რომ "რუსთავი 2-ის" საქმე ქართული სახელმწიფოსთვის უკან გადადგმული ნაბიჯია. ჰერმანთან ინტერვიუს "ამერიკის ხმის" ქართული რედაქცია ავრცელებს.
