საგარეო საქმეთა მინისტრი გიორგი კვირიკაშვილი მიიჩნევს, რომ რუსთავი 2-თან დაკავშირებით, უნდა შეიქმნას დამოუკიდებლობის მაღალი დონით უზრუნველყოფილი დროებითი საბჭო. მთავრობის დღევანდელი სხდომის დასრულების შემდეგ მინისტრმა ჟურნალისტებთან ასევე განაცხადა, რომ ყარამანაშვილების მიდგომა საკითხის მიმართ, არაკონსტრუქციულია.
,,არსებობს სასამართლო გადაწყვეტილება. ჩვენ არ გვაქვს არანაირი უფლება, რაიმენაირი ზეწოლა მოვახდინოთ ან ჩავერიოთ ამაში. მე ვისურვებდი, პროცესი შემდგომში ძალიან გამჭვირვალედ წარიმართოს, რომ ყველა მხარისთვის, ვისაც დამატებითი ინფორმაციის მიღება სჭირდება, მაქსიმალური ჩართულობა იქნებს უზრუნველყოფილი. ჩემი სურვილი იქნება, რომ ორივე მხრიდან არსებობდეს კონსტრუქციული მიდგომა, რათა არხის სარედაქციო დამოუკიდებლობა იქნეს უზრუნველყოფილი. მე მოვისმინე ტელეკომპანიის, არ ვიცი, არსებული ვუწოდო თუ ყოფილი, მფლობელების განცხადება, რომ უარი თქვეს რაიმე სახის მოლაპარაკებებში შესვლაზე. ვფიქრობ, ეს არ არის კონსტრუქციული დამოკიდებულება. ვისურვებდი, რომ გარდამავალ პერიოდში ან, რაც გნებავთ ის ვუწოდოთ, არსებულ პერიოდში შექმნან პროფესიული ნიშნით და დამოუკიდებლობის მაღალი დონით უზრუნველყოფილი საბჭო, რომელიც თავის მხრივ სარედაქციო პოლიტიკის დამოუკიდებლობას უზრუნველყოფს. მეტი ჩარევის ბერკეტი ჩვენ ამ შემთხვევაში არ გაგვაჩნია", -აღნიშნა მინისტრმა.
