მოსამართლე თამაზ ურთმელიძე ნინო გვენეტაძეს, ლევან მურუსიძეს და იუსტიციის უმაღლესი საბჭოს მოსამართლე და არამოსამართლე წევრებს წერილით მიმართავს. ურთმელიძე წერილში საბჭოს სხდომაზე არდასწრების მიზეზს განმარტავს.
"საქართველოს უზენაესი სასამართლოს თავმჯდომარეს, იუსტიციის უმაღლეს საბჭოს თავმჯდომარეს, 2015 წლის 6 ნოემბრის საჯაროდ გამოქვეყნებულ განცხადებასთან დაკავშირებთ, რომლითაც ქალბატონი ნინო გვენეტაძე მთავაზობდა საქართველოს იუსტიციის უმაღლეს საბჭოს ფორმატში შეხვედრას, მოგახსენებთ:
„2015 წლის 4 აგვისტოდან ჩემ წარმოებაშია სამოქალაქო საქმე ქიბარ ხალვაშის შპს პანორამას სარჩელთან დაკავშირებით, რომელშიც ერთერთი მოპასუხეა შპს სამაუწყებლო კომპანია რუსთავი 2, საქმეზე გადაწყვეტილება გამოტანილია 2015 წლის 3 ნოემბერს, ხოლო განჩინება გადაწყვეტილების აღსრულების უზრუნველყოფის თაობაზე მიღებულია 2015 ელის 5 ნოემბერს, მოპასუხეების საჯაროდ გაცხადებული პოზიციაა, რომ ისინი გაასაჩივრებენ აღნიშულ საქმეზე გამოტანილი გადაწყვეტილების უზრუნველყოფის განჩინება, შესაბამისად, ჩემი როგორც მოსამართლის ვალდებულებაა, რომ განვიხილო აღნიშული საჩივარი.
საქართველოს კონსტიტუცია, საერთო სასამართლოების შესახებ საქართველოს ორგანული კანონი ნათლად მიუთითებს, რომ აკრძალულია ანგარიშის მოთხოვნა მოსამართლისთვის კონკრეტულ საქმეზე, მიუხედავად იმისა, თუ რაოდენ მაღალი უნდა იყოს საზოგადოებრივი ინტერესი, ნებისმიერი პირი ვალდებულია დაემორჩილოს საქართველოს კონსტიტუციის იმპერატიულ მოთხოვნას.
საქართველოს იუსტიციის უმაღლესი საბჭო ასევე ნებისმიერი მოსამართლე ვალდებულია იზრუნოს სასამართლოს რეპუტაციაზე. საქართველოს იუსტიციის უმაღლესი საბჭოს სხდომაზე მოსამართლის წარდგომა კონკრეტულ საქმესთან დაკავშირებით და საზოგადოებაში დაგროვილ კითხვებზე პასუხის გაცემა პირდაპირ თუ არაპირდაპირ დატოვებს კონკრეტულ საქმეზე მოსამართლის მიერ ანგარიშს ჩაბარების შთაბეჭდილებას, რაც გამოუსწორებელ ზიანს მიაყენებს სასამართლოს ავტორიტეტს და შექმნის მომავალში ანალოგიურის განმეორების სახიფათო პრეცედენტს, ამიტომ საჭიროდ მიმაჩნია, რომ საზოგადოებას არ შევუქმნა არასწორი წარმოდგენები და არ გამოვცხადდე იუსტიციის უმაღლესი საბჭოს სხდომაზე. ჩემი როგორც საქმის განმხილველი მოსამართლის შეხედულებები საქმის განხილვასთან დაკავშირებულ ცალკეულ საკითხებზე გადმოცემულია შუალედურ გადაწყვეტილებებში (განჩინებებში), რაც შეეხება საქმის არსებითად გადაწყვეტასთან დაკავშირებულ არგუმენტებს ისინი აისახებიან საბოლოო, შემაჯამებელ გადაწყვეტილებაში.
მასმედიის საშუალებებში გავრცელებული ინფორმაციები ცხადყოფს საზოგადოების დიდ მოლოდინს დაანონსებულ შეხვედრასთან დაკავშირებით,. იმედია, იუსტიციის უმაღლესი საბჭო სრულყოფილად მიაწვდის ინფორმაციას საზოგადოებას სხდომაზე ჩემი გამოუცხადებლობის მიზეზის თაობაზე,“ - ნათქვამია საბჭოსთვის გაგზავნილ წერილში.
