პარლამენტის თავდაცვისა და უშიშროების კომიტეტის სხდომაზე თინათინ ხიდაშელმა მნიშვნელოვანი ადგილი დაუთმო თავდაცვის სამინისტროში ახლახან ამოქმედებულ პროექტს - „მხარი მხარს“, რომლის მთავარი მიზანი სუიციდის პრევენცია; სამხედროების ფსიქოსოციალური მხარდაჭერა; დაჭრილი და დაშავებული სამხედრო მოსამსახურეების რესოციალიზაციაა; სამხედრო მოსამსახურეების საზოგადოებაში რეინტეგრაცია და ცხოვრების ღირსეული პირობების შექმნა. თავდაცვის მინისტრის განცხადებით, საქართველოს თავდაცვის სამინისტროსთვის ჯარისკაცებზე ზრუნვა ერთ-ერთი მნიშვნელოვანია პრიორიტეტია.
„დავიწყეთ კამპანია „მხარი მხარს“, რომელიც ემსახურება ერთადერთ ამოცანას, რომ არ არსებობს ომი, რომელსაც იგებს მხოლოდ ჯარი, თუ საზოგადოება არ დგას მის გვერდით ასეთ დროს. ეს კამპანია ძალიან ფართო და მრავალკომპონენტიანია. პირველ ეტაპზე დავიწყეთ სუიციდის პრევენციისთვის. გაჩნდა მოსაზრება, რომ თითქოს სტატისტიკა გაიზარდა, მაგრამ ეს ასე არ არის. სამწუხაროდ, აქ ისევეა როგორც დანარჩენ ქვეყანაში, ნებისმიერ სხვა სეგმენტში, მაგრამ ჩვენ ვფიქრობთ, რომ შეიძლება თუნდაც სულ ერთი შემთხვევა გვქონდეს წლის განმავლობაში, უკვე განსაკუთრებულ მზრუნველობასა და ყურადღებას იმსახურებს. მნიშვნელოვანია, რომ ამ მიმართულებით ბევრი სხვადასხვა პროგრამა გავაძლიეროთ, ოფიციალური მხარდაჭერიდან დაწყებული საზოგადოების მხარდაჭერით დასრულებული. ჯარი მუდმივად უნდა გრძნობდეს, რომ ის ამ საზოგადოების ნაწილია, ისევე როგორც სტუდენტები ან ნებისმიერი სხვა ჯგუფი.“ - განაცხადა თინათინ ხიდაშელმა.
მინისტრმა დაჭრილი და დაშავებული სამხედრო მოსამსახურეების რეაბილიტაციის პროგრამებზეც ისაუბრა. რეაბილიტაციის პროცესში უახლესი საერთაშორისო სტანდარტების დანერგვისა და საერთაშორისო თანამეგობრობის გამოცდილების გაზიარების მიზნით საქართველოში წელიწადში ორჯერ ჩამოდის და ტრენინგს ატარებს ამერიკელი პროფესიონალებით დაკომპლექტებული მობილური სასწავლო ჯგუფი (MTT). თავდაცვის სამინისტროს სამხედროების რეპროთეზირების პროცესში მნიშნელოვან მხარდაჭერას უწევს პიტერ ჰარშის საპროთეზო კლინიკა, რომლის დახმარებითაც 3 წლიანი კონტრაქტის ფარგლებში მოხდა 19 ამპუტირებული სამხედრო მოსამსახურის პროტეზირება. უკრაინის შეიარაღებულ ძალებთან თანამშრომლობის საფუძველზე კი 2015 წელს წეროვანის სარეაბილიტაციო ცენტრში რეაბილიტაციის კურსი ჩაუტარდა 24 უკრაინელ სამხედროს. თავდაცვის სამინისტროს ინიციატივით გრძელდება ამპუტირებული სამხედრო მოსამსახურეების საცხოვრებელი ფართებით დაკმაყოფილება.
სოციალური პროგრამების ეფექტურად განხორციელების მიზნით, საქართველოს თავდაცვის სამინისტროს სამოქალაქო ოფისში შეიქმნა დაჭრილ და დაშავებულ სამხედრო მოსამსახურეთა მხარდაჭერის დეპარტამენტი, რომელიც ახორციელებს დაჭრილი და დაშავებული სამხედრო მოსამსახურეებსა და მათი ოჯახის წევრების სოციალურ დახმარებას.
“დაჭრილ და დაშავებულ სამხედრო მოსამსახურეთა მხარდაჭერის დეპარტამენტის წარმომადგენლები ვიზიტით აშშ-ში იმყოფებოდნენ, სადაც ანალოგიური დეპარტამენტის წარმომადგენლებს შეხვდნენ და ორი ძალიან სერიოზული, ახალი შემოთავაზება ჩამოიტანეს ფინანსური დახმარების კუთხით. ეს თემა არ შეიძლება იყოს მხოლოდ თავდაცვის სამინისტროსა და ჩვენი უცხოელი მეგობრების ზრუნვის საგანი. ვეძებთ 178 ბიზნესმენს, რომლებიც მზად იქნებიან, დააფინანსონ ამ ოჯახების სხვადასხვა სოციალური საჭიროებები. ჩვენ სრული მონაცემები გვაქვს, სრული ინფორმაცია შეგვიძლია მივაწოდოთ ნებისმიერ დაინტერესებულ პირს. ჩვენ მათ ვთავაზობთ დახმარებას, რომ ჰყავდეთ სამსახურში ადამიანები, რომლებიც განსაკუთრებული თავდადებითა და სამოქალაქო პასუხისმგებლობით გამოირჩევიან”, - განაცხადა თინათინ ხიდაშელმა.
