ამერიკის ელჩის მოადგილე ნიკოლას ბერლინერი აცხადებს, რომ ბოლო 24 საათში განვითარებული მოვლენები აღელვებს. საერთაშორისო გამჭვირვალობა - საქართველოს მიერ დიპლომატებთაბთან გამართული შეხვედრის შემდეგ მან განაცხადა ასევე, რომ გამოხატვის თავისუფლება განსაკუთრებით მნიშვნელოვანია მოახლოებული არჩევნების გამოც.
"არ არის საჭირო იმის თქმა, რომ შეხვედრა ეხებოდა რუსთავი 2-ის ირგვლივ შექმნილ ვითარებას და მასთან დაკავშირებულ მოვლენებს. საიდუმლო არ არის, რომ შეერთებული შტატები შეშფოთებას გამოთქვამს მიმდინარე მოვლენებთან დაკავშირებით.
ელჩმა უკვე გაავრცელა განცხადება. რაც შეეხება სამოქალაქო საზოგადოებასთან შეხვედრას, ვილაპარაკეთ მედიის თავისუფლებაზე, აზრის გამოხატვის თავისუფლებაზე და ზოგადად იმაზე, რომ ეს სივრცე გახსნილი უნდა დარჩეს, მითუმეტეს ახლა, როდესაც ქვეყანაში არჩევნების წელი ახლოვდება.ამას სასიცოცხლო მნიშვნელობა აქვს.
ჩვენ სწორად ვაქებდით ბევრ რამეს ამ ქვეყანაში, დემოკრატიული განვითარების კუთხით. სამოქალაქო საზოგადოება, რომელიც დღევანდელ შეხვედრაზე იყო წარმოდგენილი, ამის პოზიტიური მაგალითია.
მაგრამ ბოლო 24 საათში განვითარებული მოვლენები ძალიან გვაღელვებს. მინდა გავიმეორო, რაც ელჩმა არაერთხელ თქვა– მნიშვნელოვანია, ეს საკითხები გადაიჭრას მშვიდობიანი, დიალოგის გზით და ხალხმა სიმშვიდე შეინარჩუნოს," - განაცახა ნიკოლას ბერლინერმა.
საერთაშორისო გამჭვირვალობა - საქართველოს ოფისში დიპლომატებთან შეხვედრასაათზე მეტხანს მიმდინარეობდა. არასამთავრობო ორგანიზაციების წარმომადგენლებმა დიპლომატებს მიაწოდეს ინფორმაცია ქვეყანაში არსებული ვითარების შესახებ და მოუწოდეს, რომ მკაცრი პოზიცია დააფიქსირონ რუსთავი2-ის ირგვლივ განვითარებული მოვლენების შესახებ.
