ფრაქცია „რესპუბლიკელების“ თავმჯდომარე დავით ბერძენიშვილი მიიჩნევს, რომ „რუსთავი 2“-ის საკითხი სამართალმა უნდა გადაწყვიტოს და არა პოლიტიკურმა კონიქტიურამ.
ბერძენიშვილის განცხადებით, როგორც საკონსტიტუციო სასამართლოს, ასევე ურთმელიძის გადაწვეტილებებში არ უნდა იყოს, პოლიტიკური ასპექტები, რომელიც ძველი და ახალი ხელისუფლებების მიმართ კეთილგანწყობილებების გამომხატველია.
მისი თქმით, ორივე სასამართლო ხელისუფლებას მოეთხოვება, რომ იყოს კვალიფიციური, ფრთხილი და პასუხისმგებლიანი.
„მოსამართლეები, რომლებიც ბათუმშიც სხედან, ძალიან უპასუხისმგებლოდ მოიქცნენ. მას შემდეგ, რაც საქართველოს დამოუკიდებლობა გამოცხადდა, ჩემს ცხოვრებაში სასამართლოსთან მიმართებაში ასეთ განცხადებას პირველად ვაკეთებ. როგორც ჩანს, ურთმელიძე მისი პოლიტიკური მოტივაციით იქცევა, თორე, ჩვენ ეს არ გვჭირდება. მგონი, ურთმელიძემ ჩვენი პოლიტიკური მოტივაცია ვერ გამოიცნო. „რესპუბლიკური პარტიისთვის“ ღამღამობით მიღებული გადაწყვეტილება მოულოდნელია. ჩვენთვის მოულოდნელი საკონსტიტუციო სასამართლოს გადაწყვეტილებაც იყო. არც ერთი და არც მეორე გადაწყვეტილება არ მომწონს. ალბათ, შემკვეთი ვიღაც-ვიღაცეები არიან ძველი თუ ახალი ხელისუფლებიდან, მაგრამ არცერთი არ მიმაჩნია საკმარისად იმისთვის, რომ მოსამართლემ ასეთი საპასუხისმგებლო გადაწყვეტილება მიიღოს. ამიტომ, იმედი მაქვს, რომ ფორმები მოიძებნება“, - განაცხადა ბერძენიშვილმა.
კანონმდებელი „რუსთავი 2“-ის მფლობელების საკითხს ეხება.
„ის, რომ „რუსთავი 2“-ის მაკონტროელებელი მხარე, მისი მფლობელები სააკაშვილისგან შორს არ არიან, სააკაშვილი და ყარამანიშვილი რომ ერთი წრეა, ეს სიახლე არ არის. ის, რომ „რუსთავი 2“-ის საკუთრების საკითხი ყოველთვის სახელისუფლებო კულუარებში წყდებოდა, არც ესაა ახალი. ქონება ქიბარ ხალვაშმა როგორ მიიღო, როგორ წაართვეს ჯარჯის, მანამდე რატომ არ იჩხუბა ჯარჯიმ, როგორ იქცეოდა ეროსი, როცა ოქრუაშვილი მინისტრი არ იყო, მერე რატომ წაართვეს ქონება ქიბარს და მერე მიშამ რატომ ჩაიდო ჯიბეში უშუალოდ და პირდაპირ ყარამანიშვილების ხელით, ეს ყველაფერი ვიცით, მაგრამ „რუსთავი 2“-ის როგორც წამყვანი არხის, ყოფნა-არყოფნის საკითხი არასოდეს არ დამდგარა და არ დადგება. მფლობელების საკითხი დგას. არცერთი მესაკუთრე არ არის უმწიკვლო. ყველა მესაკუთრეს თავისი წილი აქვს უწესო გადაწყვეტილებებში, თუმცა, პირველ მფლობელებს არ ვგულისხმობ. აქიმიძის და დვალის შემდეგ, ყველას აქვს თავისი წილი, რადგან ტელევიზია ყველამ ხელისუფლებით მიიღო და ყველამ ხელისუფლებით დაკარგა. არ მინდა, რომ ეს პროცესი გაგრძელდეს და საკითხი ხელისუფლებამ გადაწყვიტოს, სამართალმა უნდა გადაწყვიტოს. მგონი, დღევანდელი მფლობელების ოპონენტებს სერიოზული არგუმენტები აქვთ. ეს საკითხი სამართალმა უნდა გადაწყვიტოს და არა პოლიტიკურმა კონიქტიურამ“, - განაცხადა ბერძენიშვილმა.
