ქიბარ ხალვაშის ადვოკატი პაატა სალია აცხადებს, რომ სასამართლოს გადაწყვეტილების აღსრულების უზრუნველყოფის მოთხოვნით, მოსამართლე თამაზ ურთმელიძეს 4 ნოემბერს მიმართეს. ადვოკატმა დღეს გამართულ საგანგებო პრესკონფერნციაზე ასევე განმარტა, რომ ტელეკომპანია იმართება იმ პირებისგან, რომელთაც რუსთავი 2-თან არანაირი სამართლებრივი კავშირი არ აქვთ.
"ეს არის სასამართლოს გადაწყვეტილების აღსრულების უზრუნველყოფა და არა დაუყოვნებლივი აღსრულება. ამის შესახებ არასწორი ინფორმაცია ვრცელდება, ჩვენ პატივს ვცემთ საკონსტიტუციო სასამართლოს და გამოვიყენეთ სამოქალაქო საპროცესოს კოდექსის ნორმა იმისთვის, რომ მაქსიმალურად აგვერიდებინა ტელეკომპანია იმ მოვლენებისთვის, რომლებიც იგეგმებოდა და ცნობილი გახდა. გვინდა, ტელეკომპანია მინიმალურად იყოს ჩართული და საერთოდ ავარიდოთ ამ პოლიტიკურ პროცესებს, ტელევიზიის ფუნქციონირება უნდა გაგრძელდეს ჩვეულ რეჟიმში. გადაწყვეტილება არ ითვალისწინებს ჟურნალისტური საქმიაობის შეფერხებას" - თქვა სალიამ.
ადვოკატის განცხადებითვე, მოსამართლის გუშინდელი განჩინების გასაჩივრება რეგისტრირებულ მეწილეებს ძმებ ყარამანაშვილებს, ტელეკომპანია საქართველოს და ნინო ნიჟარაძეს შეუძლიათ.
"ესენი არიან მხარეები, რომლებსაც არ შეზღუდვიათ არც ერთი წუთით მონაწილეობა მიეღოთ პროცესში. მათ უფლება აქვთ, ეს განჩინება ჩვეულებრივ გაასაჩივრონ" - თქვა სალიამ.
ქიბარ ხალვაშის, დავით დვალის, ჯარჯი აქიმიძის, რეზო საყევარიშვილის და პაატა სალიას ბრიფინგი სასტუმრო რედისონში ამ წუთებში მიმდინარეობს.
