ადვოკატი რომეო საჯაია აცხადებს, რომ სახელმწიფო უსაფრთოხების სამსახურში ,,სრული ჭორაობა და მასხარაობაა”. ხუთსაათიანი დაკითხვის შემდეგ, საჯაიამ ჟურნალისტებთან განაცხადა, ასევე, რომ აუდიოჩანაწერები მხოლოდ ფაბრიკაციაა.
„სრული მასხარაობა და ჭორაობაა, რასაც ამ შენობაში ახორციელებენ. რაიმე კონკრეტული, ფაქტებზე დამყარებული არანაირი მტკიცებულება არ გააჩნიათ. მოვითხოვე ეჩვენებინათ, თუ ჰქონდათ ბრძანება, სასამართლოს განჩინება, რის საფუძველზე უსმენენ ამ ადამიანებს, საიდან მოიტანეს ეს ჩანაწერები, ამ კითხვებზე პასუხიები არ გააჩნიათ“, - განაცხადა რომეო საჯაიამ.
მისი თქმით, აუდიოჩანაწერში საუბრის დიდი ნაწილი დამონტაჟებულია და ავთენტური არ არის.
„ეს ყველაფერი ერთადერთ მიზანს ემსახურება, რომ ადამიანები შეაჩერეონ, შეაშინონ, რათა „რუსთავი 2“-თან თავისუფალი სიტყვის დასაცავად არ მივიდნენ“, -დასძინა ადვოკატმა.
რომეო საჯაია დაკითხვაზე უკრაინულ ვებგვერდზე გავრცელებულ აუდიოჩანაწერთან დაკავშირებით დაიბარეს, სადაც ის კუდ-ის ყოფილ მაღალჩინოსანთან დათა ახალაიასთან საუბრობს. საუბარი ტელეკომპანია "რუსთავი 2"-ის შენობასთან ყოფილი სპეცრაზლემების მიყვანას ეხება.
