მოსამართლე ნანა დარასელიამ გაზპრომის საწინააღმდეგო პოსტერის გაკვრისთვის 16 ოქტომბერს დაკავებული სტუდენტის, სალომე ხვადაგიანის სასამართლო პროცესი გადადო. მოსამართლე მერიისგან ითხოვს ქალაქში არსებული ადგილების ჩამონათვალს, სადაც პოსტერების გაკვრა დასაშვებია.
მანამდე, სასამართლომ ამავე საქმეზე დაკავებული ტაბულას დირექტორი თამარ ჩერგოლეიშვილი სამართალდამრღვევად გამოაცხადა და სიტყვიერი გაფრთხილება მისცა. ჩერგოლეიშვილის საქმე სხვა მოსამართლემ დღეს განიხილა.
მოსამართლემ გაიზიარა სახალხო დამცველის შენიშვნა, რომ განათების სვეტი არ ხვდება იმ ჩამონათვალში, სადაც პოსტერის გაკვრა სამართალდარღვევას წარმოადგენს, თუმცა, ამის მიუხედავად, ჩერგოლეიშვილი მაინც სამართალდამრღვევად ცნო.
ტაბულას დირექტორი დღევანდელი გადაწყვეტილების, ასევე 16 ოქტომბრის უკანონო დაკავების გასაჩივრებას აპირებს.
ამავე საქმეზე დაკავებული ტაბულას გენერალური პროდიუსერის, ლექსო მაჭავარიანის სასამართლო პროცესი კი 17 ნოემბერს გაიმართება. სალომე ხვადაგიანის პროცესი კი 25 დეკემბერს, 16:00 საათზე გაიმართება.
