პარლამენტის ევროინტერგაციის კომიტეტის თავმჯდომარე ლევან ბერძენიშვილი „პატრიოტთა ალიანსის“ ლიდერს, ირმა ინაშვილს მოუწოდებს „რესპუბლიკურ პარტიას“ თავი დაანებოს.
როგორც ჟურნალისტებს ბერძენიშვილმა განუცხადა, მედიას შეუძლია, „ნაციონალურ მოძრაობასაც“ ჰკითხოს, ის ასოცირდება თუ არა მათთან.
„ირმა ინაშვილს მინდა ვუთხრა, რომ ცხოვრებაში წარმატებაც მქონია და წარუმატებლობაც. ქალბატონი ირმა, პოლიტიკაში ახალი კადრია, ის პარლამენტის წევრიც ჯერ არ ყოფილა. მას წარმატებებიც ექნება და მოგებებიც. მან დამარცხება უნდა ისწავლოს და აღიარებაც. ყველაზე მთავარი დამარცხების სწავლაა. გამარჯვების აღიარების სწავლაზე ადვილი არაფერია. შალვა ნათელაშვილმა არჩევნები ერთხელ რომ მოიგო, მას ეს დღემდე არ დაავიწყდა, ხოლო დამარცხება ვერაფრით ვერ დაივიწყა. ქალბატონ ირმას ვურჩევ, „რესპუბლიკურ პარტიას“ თავი დააანებოს. მას უთქვამს, ამ პარტიას გავაუქმებო და უკაცრავად, მაგრამ ქალბატონო ირმა, 40 წლის წინ, ეს პარტია იმიტომ კი არ შევქმენით, რომ თქვენ მოსულიყავით და გაგეუქმებინათ. პარტია მაშინ გაუქმდება, როცა ამის საჭიროებას ქართველი ხალხი დააყენებს. ჩვენმა კანდიდატამა ბრძოლაში ინაშვილი დაამარცხა და რა მოხდა მერე? მას რომ მოეგო, ჩვენ ვიტყოდით, რა მოხდა მერე-თქო?! სათქმელი მეტი არაფერი არ მაქვს. ვიცი, რომ ფართომასშტაბიანი ბრძოლა იქნება და არ მინდა ვიხუმრო, რადგან საქმეში ისეთი კაცია ჩართული, რომ მისი შეურაცხყოფა არ შემიძლია. აქციას რუსთაველის ძეგლიდან იწყებენ და თავი რუსთაველს მაინც გაანებეთ და ხიდაშელებზე პირდაპირ გადადით“, - განაცხადა ბერძენიშვილმა.
შეგახსენებთ, ირმა ინაშვილი შუალედური არჩევნების შედეგებს აპროტესტებს და პერმანენტულ აქციებს აანონსებს.
