ფრაქცია „ქართული ოცნების“ თავმჯდომარე გია ვოლსკი აცხადებს, რომ მას კომკავშირის სისტემაში არ უმუშავია, შესაბამისად, მასზე „თავისუფლების ქარტია“ არ ვრცელდება.
„ჯი-ეჩ-ენ“-თან საუბარში ვოლსკი „თავისუფლების ქარტიის“ ავტორის, ყოფილი დეპუტატის, გია თორთლაძის მიერ მის მიმართ გაკეთებულ განცხადებას ეხმიანება და ამბობს, რომ მას გარკვეული თანამდებობა მხოლოდ პარტიაში ეკავა.
„არ ველოდი, რომ თორთლაძე ჩემზე ამას იტყოდა. კომკავშირის სისტემაში არ მიმუშავია, პარტიის გარკვეული თანამდებობა მეკავა, მაგრამ ეს კანონი ჩემზე არ ვრცელდება. ალექსანდრე კვაშნევსკიმ პოლონეთი არათუ სამშვიდობოს გაიყვანა, არამედ მან ქვეყანა ნატოს წევრი გახადა, ის კი, უმაღლესი პარტიული მუშაკი იყო. თორთლაძეს იგივე პადოშას მინდა შევახსენო, რომ მნიშვნელობა აქვს არა იმას, რა თანამდებობაზე იყავი, არამედ მნიშვნელოვანია ის, როგორი პროფესიონალი და პატრიოტი ხარ და რა ხედვები გაქვს. დარწმუნებული ვარ, ვინც პარტიულ სისტემაში მუშაობდა, ის თორთლაძეზე უფრო მეტად თუ არა, ნაკლებად არც პატრიოტია და არც პროფესიონალი“, - განაცხადა ვოლსკიმ.
საქართველოს საკონსტიტუციო სასამართლომ ყოფილი სსრკ-ის და საქართველოს სსრ-ის კომუნისტური პარტიის ცენტრალური კომიტეტების წევრებს, რაიონული და საქალაქო კომიტეტების მდივნებს, ახალგაზრდული ლენინური კომუნისტური კავშირის ცენტრალური კომიტეტების ბიუროების წევრებს სხვადასხვა სახელმწიფო დაწესებულებებში თანამდებობის დაკავების უფლება მისცა.
