საქართველოს ყოფილი საგარეო საქმეთა მინისტრი, "თავისუფალი დემოკრატების" წევრი მაია ფანჯიკიძე მიიჩნევს, რომ პირველ რიგში საქართველოსა და უკრაინას შორის ურთიერთობები უნდა გამოსწორდეს. ირაკლი ღარიბაშვილის მიერ პეტრე პოროშენკოსადმი გაგზავნილი მიმართვის კომენტირებისას მან განაცხადა, რომ მოსალოდნელია ორ ქვეყანას შორის ურთიერთობების დაძაბვა.
"უკვე წელიწადზე მეტი გავიდა მას შემდეგ რაც გვესმის, რომ უნდა შედგეს პრემიერ-მინისტრის ვიზიტი უკრაინაში, თუმცა ეს არ მომხდარა. ვერა და ვერ განხორციელდა ეს ვიზიტი და საინტერესოა რა არის მიზეზები. ეს არის ძალიან ცუდი. როგორც ჩანს, ურთიერთობები არის ძალიან დაბალ ნიშნულზე გადაყვანილი და პირველ რიგში, ეს უნდა გამოსწორდეს. წერილი კარგია, წერილი გასაგებია, მაგრამ საჭიროა აქტიური ურთიერთობები ერთმანეთთან. ეს თუ არ მოხდება, ქვეყნებს შორის ურთიერთობები დაიძაბება", - განაცხადა მაია ფანჯიკიძემ.
საქართველოს პრემიერ-მინისტრმა ოდესის გუბერნატორის მიხეილ სააკაშვილის სატელეფონო საუბრის ჩანაწერებთან დაკავშირებით, უკრაინის პრეზიდენტ პეტრო პოროშენკოს დღეს წერილი გაუგზავნა და რეაგირებისკენ მოუწოდა.
