უკრაინამ ღიად დაინახა, ოდესისი გუბერნატორი მიხეილ სააკაშვილი, საქართველოს წინააღმდეგ ანტისახელმწიფოებრივ განცხადებებს აკეთებს, - ამის შესახებ იუსტიციის მინისტრმა პრემიერ-მინისტრის მიერ, უკრაინის პრეზიდენტისადმი გაგზავლილი წერილის კომენტირებისას განაცხადა.
თეა წულუკიანი მიიჩნევს, რომ ამ მიმართვას უკრაინის მხრიდან რეაგირება აუცილებლად უნდა მოყჰვეს.
„როდესაც მე ვიყავი კიევში ვიზიტით, მაშინაც ჩვენს მეგობრებს, უკრაინელ მაღალჩინოსნებს, ვისაც შევხვდით, მათ შორის ჩემს კოლეგას, იქაურ ჟურნალისტებს ვუთხარი, რომ წარმოუდგენელი იქნებოდა, საქართველოში უკრაინის მოქალაქე იყოს მაღალჩინოსანი და უკრაინის წინააღმდეგ რაიმე ტიპის განცხადებებს აკეთებდეს-მეთქი. თავიდან, რა თქმა უნდა, ვერ მიხვდნენ რას ვგულისხმობდი და გაიკვირვეს. ახლა უკვე გაკვირვების დრო არ არის. უკრაინამ და მისმა ხელმძღვანელობამ ღიად დაინახა, რომ საქართველოდან წასული ყოფილი პრეზიდენტი, რომელიც ახლა უკრაინის ერთ-ერთი გუბერნიის ხელმძღვანელია, საქართველოს წინააღმდეგ ანტისახელმწიფოებრივ განცხადებებს აკეთებს. მისი მიდგომა არის ძალადობისკენ, ოღონდაც გაზარდონ შანსები ხელისუფლების დაბრუნების. „ნაციონალური მოძრაობა“ კი მზად არის და არ მოერიდება იმას, რომ ხელი შეუწყოს საქართველოში სისხლის ღვრას“, - განაცხადა იუსტიციის მინისტრმა.
მისი თქმით, ამასთან დაკავშირებით უკრაინის პრეზიდენტმა უნდა გააკეთოს რეაგირება.
„ამაზე უკრაინის პრეზიდენტმა და ხელმძღვანელობამ უნდა გააკეთოს რეაგირება. რა იქნება რეაგირება, ამის მრჩევლად ჩვენ ვერ გამოვდგებით, რადგან უკრაინა სუვერენული სახელმწიფოა“, - დასძინა წულუკიანმა.
