29-30 ოქტომბერს, ბარბადოსის დედაქალაქმა ბრიჯტანმა, უმასპინძლა გამჭვირვალობისა და ინფორმაციის გაცვლის გლობალური ფორუმის რიგით მე-8 პლენარულ სესიას.
ფინანსთა სამინისტროს ინფორმაციით, პლენარული სესია გლობალური ფორუმის გადაწყვეტილების მიმღები უმაღლესი წარმომადგენლობითი ორგანოა, რომელიც აერთიანებს 129 სახელმწიფოს, მათ შორის, საქართველოსაც, (რომელიც გლობალური ფორუმის წევრია 2011 წლიდან) და ათამდე საერთაშორისო ორგანიზაციას, მათ შორის, ევროკოკავშირსა და გაეროს.
აღნიშნულ შეხვედრას საქართველოს მხრიდან ესწრებოდნენ საქართველოს ფინანსთა მინისტრის მოადგილე ლაშა ხუციშვილი და შემოსავლების სამსახურის წარმომადგენელი.
პლენარული სესიის მსვლელობისას, დელეგატებმა მრავალ მნიშვნელოვან საკითხთან ერთად, როგორიც არის ე.წ. „შავი სიების“ რეგულირების საკითხი, საფინანსო ინფორმაციის გაცვლის გლობალური სტანდარტის დანერგივსა და იმპლემენტაციის ხელშეწყობა, ასევე განიხილეს და დაამტკიცეს გლობალური ფორუმის ახალი მანდატი და საელმწიფოთა შეფასებების მეორე რაუნდის წესები და მეთოდოლოგია.
მიმდინარე პლენარული სესიის ფარგლებში, 29 ოქტომბერს, საქართველოს ფინანსთა მინისტრის მოადგილემ ლაშა ხუციშვილმა და სეიშელის რესპუბლიკის შემოსავლების კომისიის კომისარმა ჟორჟეტ კაპრიჩიოზემ ხელი მოაწერეს საქართველოს მთავრობასა და სეიშელის რესპუბლიკის მთავრობას შორის საგადასახადო საკითხებში ინფორმაციის გაცვლის შესახებ შეთანხმებას.
აღნიშნული შეთანხმება პირველი სამართლებრივი ინსტრუმენტია, რომელიც ორ სახელმწიფოს შორის გაფორმდა საგადასახადო მიმართულებით და ითვალისწინებს ურთიერთდახმარებას საგადასახადო ინფორმაციის გაცვლის საკითხებში, რათა გაუმჯობესდეს საგადასახადო გამჭვირვალეობა და საგადასახადო კანონმდებლობის ადმინისტრირება.
კერძოდ, აღნიშნული შეთანხმება ითვალისწინებს საქართველოსა და სეიშელის რესულიკას შორის მოთხოვნის საფუძველზე ინფორმაციის გაცვლას. ასევე, გასვლითი საგადასახადო შემოწმების ჩატარებისა და მხარეებს შორის შეთანხმების ინტერპრეტაციასა და გამოყენაბასთან დაკავშირებით წარმოშობილი სირთულეების ურთიერთშეთანხმების გზით მოგვარების შესაძლებლობას.
