დევნილთა მინისტრი სოზარ სუბარი იმ ჩანაწერებს ეხმაურება , რომელშიც საქართველოს ყოფილი პრეზიდენტი მიხეილ სააკაშვილი ტელეკომპანია "რუსთავი 2"-ის გენერალურ დირექტორს, ნიკა გვარამიას და "ნაციონალური მოძრაობის" საერთაშორისო მდივანს გიგა ბოკერიას ესაუბრება.
სოზარ სუბარის თქმით, ექსპრეზიდენტ სააკაშვილს სურს, რომ სისხლი დაიღვაროს. რაც შეეხება სისხლის სამართლის საქმეს, მინისტრის თქმით, ამას გამოძიება დაადგენს, ვინ არის დამნაშავე, რა დანაშაულთან გვაქვს საქმე და რა შედეგები უნდა მოჰყვეს.
"მიხეილ სააკაშვილს რომ საქართველო და, ზოგადად, ადამიანი ერთადერთი რამისთვის, თავისი კარიერისთვის უნდოდა, ყველამ კარგად ვიცოდით, თუ ვინმემ აქამდე არ იცოდა, ის ახლაც ვერ გაიგებს ვერაფერს ამ დიალოგიდან, რადგან ისინი არიან მიშა სააკაშვილის სექტის წევრები და ისინი ვერასდროს ვერაფერს გაიგებენ. დანარჩენებისთვის ყველაფერი ნათელი იყო აქამდე და ნათელია დღემდე. ამ ადამიანს უნდა, რომ დაიღვაროს სისხლი იმისთვის, რომ ამით საფუძველი შეიქმნას მისი ქვეყანაში დაბრუნების, მაგრამ ეს არ მოხდება და ვერ მოხდება და ეს ნათლად თქვა ქართველმა ხალხმა ჯერ კიდევ 2012 წლის ოქტომბერში", - განაცხადა სოზარ სუბარმა.
