რუსთავი 2-ის გენერალური დირექტორი ნიკა გვარამია ხაზგასმით აცხადებს, რომ არ მას და არც ტელეკომპანიის თანამშრომლებს მიხეილ სააკაშვილისგან ფული არ აუღიათ.
მან ჟურნალისტებთან განმარტება იმ ფინანსურ საკითხებზე გააკეთა, რაზეც საუბარია გუშინ გავრცელებულ აუდიოჩანაწერში. მისი თქმით, მან სააკაშვილს, როგორც მეგობარს, გაუზიარა წუხილი ტელეკომპანიის ფინანსურ ზარალთან დაკავშირებით.
"აქ არ არის საუბარი ხალხის დაყენებაზე, საუბარია თანამშრომლებისთვის ხელფასების გაცემაზე. ეს პროცესი, რომელიც მიმდინარეობს, კომპანიას აზარალებს პირველ რიგში ფინანსურად და მე ჩემს მეგობარს გავუზიარე ეს პრობლემა. სააკაშვილისგან ან მისი რომელიმე მეგობრისგან არც მე და არც ტელეკომპანიას, არც ერთი ლარი არ მიგვიღია", - განაცხადა გვარამიამ.
მისივე თქმით, მიხეილ სააკაშვილი რაზეც ესაუბრებოდა, ეს არ არის გეგმა და ეს არის მოსაზრებები.
"ეს არ ყოფილა მიხეილ სააკაშვილის გეგმა, ეს არის მოსაზრებები, რომელიც მნიშვნელოვანწილად არ გაზიარებულა და კომპანიას როგორ უნდა აზარალებდეს, ვერ ვხვდები", - აღნიშნა გვარამიამ.
