სისხლის სამართლის პასუხიმსგებლობა ეკისრება პიროვნებას და არა რომელიმე ქვეყნის მოქალაქეს, - ამის შესახებ პარლამენტის თავმჯდომარე დავით უსუფაშვილმა განაცხადა. მისი თქმით, არ ფიქრობს, რომ სახელმწიფომ ყოფილ პრეზიდენტს, მიხეილ სააკაშვილს საქართველოს მოქალაქეობა უნდა შეუნარჩუნოს.
როგორც ჟურნალისტებს უსუფაშვილმა განუმარტა, კონსტიტუციაში წერია, რომ საქართველოს მოქალაქე არ შეიძლება ამავდროულად სხვა ქვეყნის მოქალაქე იყოს.
„ეს ადამიანის გადასაწყვეტია. სააკაშვილმა ასეთი გადაწყვეტილება მიიღო და არ მგონია, სახელმწიფოს შესაძლებლობა ჰქონდეს, მას ის შეუნარჩუნოს, რასაც კონსტიტუცია კრძალავს. ასევე არ მგონია, რომ აქ ტექნიკური გადაწყვეტილების გარდა, რაიმე არსობრივ-პოლიტიკური საკითხია გადასაწყვეტი. რაც შეეხება სისხლის სამართლის საქმის საკითხს, სისხლის სამართლის პასუხიმსგებლობა ეკისრება პიროვნებას და არა მოქალაქეს. თუკი ვინმემ მაღაზია გაქურდა, ჩვენ იმას ვიკვლევთ, ის რომელი ქვეყნის მოქალაქეა, თუ ქურდს ვსჯით? - ასევეა ყველა სხვა დანაშაულებრივ საქმესთან დაკავშირებით“, - განაცხადა უსუფაშვილმა.
შგახსენებთ, ახალგაზრდა იურისტთა ასოციაციის თავმჯდომარე, ანა ნაცვლიშვილი აცხადებს, რომ თუ პირის მიმართ მიმდინარეობს გამოძიება, მისთვის მოქალაქეობის ჩამორთმევა ვერ მოხდება. როგორც მან ჟურნალისტებთან აღნიშნა, ასეთ შემთხვევაში პირიქით, მას მოქალაქეობა უნდა შეუნარჩუნდეს.
მიხეილ სააკაშვილისთვის საქართველოს მოქალაქეობის ჩამორთმევის მიზნით, სამართლებრივი პროცედურის დაწყებასთან დაკავშირებით, ნაცვლიშვილი აცხადებს, რომ მოცემულ ეტაპზე, ამის საფუძვლებს არ ხედავს.
"მოქალაქეობის ჩამორთმევისას უნდა არსებობდეს კონკრეტული სამართლებრივი საფუძვლები, რომლებიც ამ ეტაპზე არა მგონია, რომ სახეზე გვქონდეს. ამიტომ მოცემულ ეტაპზე ამაზე საუბარი ვფიქრობ, რომ არ არის სამართლებრივად სწორი. არ ვიცი რა საფუძველს შეიძლება გულისხმობდეს იუსტიციის მინისტრი, მაგრამ მე ვერ ვხედავ, რომ ეს საფუძველი არსებობდეს. თუ პირის მიმართ მიმდინარეობს გამოძიება, ან არსებობს ეჭვები, რომ შეიძლება მონაწილეობდეს რაიმე ფორმით რაიმე დანაშაულში პირიქით, ამ შემთხვევაში ვერ მოხდება მისთვის მოქალაქეობის ჩამორთმევა. არც საფუძვლები ითვალისწინებს ამას. ასეთ შემთხვევაში პირიქით, მოქალაქეობა უნდა შეუნარჩუნდეს პირს და გამოძიება გაგრძელდეს", - განმარტავს ნაცვლიშვილი.
