პარლამენტის ვიცე-სპიკერის, ზვიად ძიძიგურის განცხადებით, მიხეილ სააკაშვილისთვის „რუსთავი 2” მშვენიერი საბაბია, რომ ქვეყანაში როგორმე სამოქალაქო არეულობა გამოიწვიოს.
ჟურნალისტებთან საუბარში ძიძიგურმა საქართველოში ჩატარებული საპროტესტო გამოსვლები გაიხსენა და განაცხადა, რომ მაშინდელი ოპოზიცია აქციებს კანონის ფარგლებში ატარებდა.
მისი თქმით, 2007 წელს, სააკაშვილს დიდი პრობლემები იმიტომ შეექმნა, რომ მან დემონსტრაციის დარბევის და მედიის ნაწილშიც ყველანაიარი ტიპის უფლებამოსილებას გადაამეტა.
„რა თქმა უნდა, ზღვარზეც გავდიოდით ხოლმე, მაგრამ გამოხატვის თავისუფლება ჩარჩოში ჯდებოდა. ის, რომ სასამართლოს გადაწყვეტილებას არ დაემორჩილები, სწორედაც რომ კონსტიტუციური წესრიგის დარღვევაა. კონტექსტი ერთმანეთთან რომ შევადაროთ, ჩვენ საპროტესტო აქციები 2008 წლის აგვისტოს ომის შემდეგ წამოვიწყეთ, როდესაც ჩვენთვის იმ ხელისუფლების სათავეში ყოფნა კატეგორიულად მიუღებელი იყო, რომელმაც ტერიტორიები დაკარგა. ბოდიში მომითხოვია და დღევანდელი კონტექსტები ერთმანეთთან არ მიდის. სააკაშვილისათვის „რუსთავი 2“ მშვენიერი საბაბია, რომ მან ქვეყანაში როგორმე სამოქალაქო არეულობა გამოიწვიოს. ეს მისი სურვილია და ამ სერიას პირობითად „რუსთავი 2“ ჰქვია, რომელსაც ისინი დგამენ“, - განაცხადა ძიძიგურმა.
