თავდაცვის კომიტეტის თავმჯდომარის, ირაკლი სესიაშვილის შეფასებით, ტელეკომპანია „რუსთავი 2“-ის სახით ნაღმის ამოქმედება ხდება.
როგორც ჟურნალისტებს სესიაშვილმა განუცხადა, „რუსთავი 2“ ძალიან კარგი ტელეკომპანიაა, რომელშიც სამწუხაროდ, ყოფილმა პრეზიდენტმა, მიხეილ სააკაშვილმა ნაღმი ჩადო, რაც იმაში გამოიხატება, რომ 2004 წლიდან 2012 წლამდე, ეს ტელევიზია სხვადასხვა ადამიანის ხელში 20-ჯერ გადავიდა და უკანონოდ გასხვისდა.
სესიაშვილის ცნობით, წლების მანძილზე, ეს ტელევიზია იმ ადამიანების ხელში გადადიოდა, რომლებიც ნაციონალებთან იყვნენ დაკავშირებულნი. კერძოდ, კეზერაშვილი, ოქრუაშვილი, სააკაშვილი და უგულავა.
„სამწუხაროდ, ამ ნაღმის ამოქმედება ხდება. ბევრი ჟურნალისტი საკუთარ საქმეს ემსახურება და ეს ადამიანები ჩემთვის მსხვერპლნი არიან. ამ ადამიანების გამოყენება ისევ და ისევ პოლიტიკური მიზნებისთვის ხდება, რაც მეორე ნაღმია, რომელსაც სააკაშვილი უგულოდ აქეთ-იქით ყრის. მთავარია, რომ ყველამ სიმშვიდე შევინარჩუნოთ, რადგან არავითარი ემოციური გამოხტომები და ძალადობა არ უნდა იყოს“, - განაცხადა სესიაშვილმა.
