რუსთავი 2-ის გენერალური დირექტორის მოადგილე ზაალ უდუმაშვილი აცხადებს, რომ აუდიოჩანაწერების გავრცელებამ ტელეკომპანიის თანამშრომლების ერთიანობა გაამყარა. დღეს გამართულ ბრიფინგზა მან ასევე განაცხადა, რომ ამისათვის მადლობას უხდის აუდიოჩანაწერების გამომქვეყნებელს.
"ბოლო თვეების განმავლობაში ხელისუფლების მხრიდან "რუსთავი 2"-ის წინააღმდეგ ბრძოლის მთავარი იარაღი იყო სასამართლო, რომელსაც, პრაქტიკულად, სახე დაკარგული აქვს და ეს ჩვენმა პროცესებმა აჩვენა. თუმცა, ბოლო დღეებში ახალი იარაღი გამოჩნდა და ეს არის შანტაჟი. "რუსთავი 2"-ის გენერალურ დირექტორ ნიკა გვარამიას ჯერ ოჯახის წევრების უსაფრთხოებით, შემდეგ ვიდეო და აუდიოჩანაწერების გამოქვეყნებით ემუქრებოდნენ და ეს მუქარა გუშინ ხელისუფლებამ ნაწილობრივ აღასრულა. მემგონი ყველაზე დიდ სკეპტიკოსსაც აღარ შეაქვს ეჭვი იმაში, რომ შანტაჟს ჰქონდა ადგილი ნიკა გვარამიას წინააღმდეგ. ამ შანტაჟის მთავარი მიზანი ორი რამ იყო. პირველი: დაეზარალებინათ თავად ნიკა გვარამია და მეორე: შეეტანათ განხეთქილება "რუსთავი 2"-ში. მე მინდა ამ ჩანაწერების ავტორებს და სულისჩამდგმელებს ვუთხრა და გავუცრუო იმედები – ამ ჩანაწერებით ნიკა გვარამია ვერაფრით ვერ დაზარალდება, ისევე როგორც "რუსთავი 2" დღეს კიდევ უფრო ერთიანი და ძლიერია. ამისთვის შეგვიძლია მადლობაც გადაგიხადოთ", - განაცხადა ზაალ უდუმაშვილმა.
"რუსთავი 2"-ის გენერალური დირექტორის მოადგილის შეფასებით,
სასწორზე დგას არა "რუსთავი 2"-ის კომფორტი და მისი კეთილდღეობა, არამედ სიტყვის და გამოხატვის თავისუფლება ამ ქვეყანაში.
