პარლამენტის ვიცე-სპიკერი მანანა კობახიძე აცხადებს, რომ ფარული მოსმენების უნდა ეშინოდეთ მხოლოდ კრიმინალებს. გუშინ მედიაში გავრცელებულ ჩანაწერებთან დაკავშირებით, სადაც მიხეილ სააკაშვილს გიგა ბოკერია და ნიკა გვარამია ესაუბრებიან, კობახიძე ამბობს, რომ მოსმენების გარეშე არცერთი სახელმწიფო არ არსებობს.
,,თუ დანაშაულის მომზადების შესახებ ოპერატიული ინფორმაცია არსებობს, სწორედაც კანონი ავალებს შესაბამის უწყებას, რომ აწარმოოს ყველა აუცილებელი საგამოძიებო მოქმედება, მათ შორის ფარული, დიახ, მოსმენაც. ეს ხდება ყველაზე დემოკრატიულ ქვეყნებში, ამის გარეშე სახელმწიფო არ არსებობს და ეს კარგად იცის გვარამიამ! მაგრამ დემაგოგია ხომ მათი სტილია! სწორედაც რომ დროულობა და ოპერატიულობა განაპირობებს დანაშაულის პრევენციას და თუ ვინმეს ამ ქვეყანაში მოუსმენენ, მხოლოდ კანონის დაცვით და მხოლოდ იმიტომ, რომ ჩვენი ქვეყნის და საზოგადოების უსაფრთხოება იყოს დაცული და ეშინოდეთ მხოლოდ კრიმინალებს, ვის თავშიც მზაკვრული გეგმები იხარშება, ადამიანებს არავინ უსმენს და არავინ ერჩის! აწი, გამოძიებამ უნდა გაარკვიოს, ვინ რას გეგმავდა, ვინ ისმენდა, ვინ სად რა ატვირთა და ა.შ.”, - განაცხადა კობახიძემ.
