საქართველოს პრეზიდენტი ჯაშუშობაში ბრალდებულ ფოტორეპორტიორებს, ირაკლი გედენიძესა და გია აბდალაძეს შეხვდა და მათი საქმის მიმდინარეობით დაინტერესდა.
"პრეზიდენტს გავაცანით ჩვენს საქმესთან დაკავშირებით არსებული ვითარება, ვუთხარით, რომ ფოტოგრაფების საქმეს დღემდე გრიფით "საიდუმლო" ადევს და რომ ჩვენ ამ დრომდე ვითხოვთ მის მოხსნას. ასევე, გამოვთქვით იმედი, რომ სასამართლო მიიღებს სწორ გადაწყვეტილებას და მოგვიხსნის იმ ბრალს, რომელიც წაყენებული გვქონდა",- განაცხადა შეხვედრის შემდეგ ჟურნალისტებთან გია აბდალაძემ.
ირაკლი გედენიძის თქმით კი, პრეზიდენტი მისი კომპეტენციის ფარგლებში, დახმარებას დაპირდათ.
,,ორი წლის წინ პროკურატურაში ჩვენი საქმის თავიდან გამოძიების მოთხოვნით განცხადება შევიტანეთ, რის შემდეგაც გვცნეს დაზარალულებლად, მაგრამ ამის მერე ეს პროცესი გაჭიანურდა, რის ერთ-ერთ მოტივადაც სახელდება ის, რომ საქმეს ადევს გრიფით "საიდუმლო". ეს უნდა მოიხსნას იმ ორგანოს მიერ, რომელმაც გრიფი დაადო, ეს კი, ჩვენი ინფორმაციით, კონტრდაზვერვის სამსახურია. პრეზიდენტს, რომელიც ჩვენი საქმით დაინტერესდა, ავუხსენით არსებული ვითარება. ის შეგვპირდა, რომ მისი კომპეტენციის ფარგლებში დახმარებას გაგვიწევს ამ მიმართულებით", - აღნიშნა ირაკლი გედენიძემ.
