ციხის სკანდალური კადრების ავტორმა ლადო ბედუკაძემ სამსაათიანი დაკითხვის შემდეგ, ქალაქის პროკურატურა დატოვა. მან ჟურნალისტებთან კომენტარზე უარი იმ მიზეზით განაცხადა, რომ ადგილზე იმყოფებოდა რუსთავი 2-ის გადამღები ჯგუფიც.
,,რუსთავი 2-ს კომენტარს მონობიდან გათავისუფლების შემდეგ მივცემ. სხვა მედიასაშუალებებს ცალკე მივცემ ინტერვიუს", - განაცხადა ბედუკაძემ და ტერიტორია დატოვა.
რაც შეეხება ბედუკაძის დაკითხვის მოტივაციას, მთავრი პროკურატურის ინფორმაციით, ჟურნალისტმა ნინო ჯღარკავამ თბილისის პროკურატურას მიმართა განცხადებით, რომ ტელეკომპანია რუსთავის 2-ით ვრცელდებოდა თითქოსდა მასა და ვლადიმერ ბედუკაძეს შორის სოციალური ქსელით განხორციელებული მიმოწერა ე.წ. ციხის კადრებთან დაკავშირებით. ჯღარკავას თქმით, ეს მიმოწერა იყო გაყალბებული.
"აღნიშნულ ფაქტთან დაკავშირებით, თბილისის პროკურატურაში მიმდინარეობს განცხადებაში მითითებული გარემოებების შესწავლა იმის დასადგენად არსებობს თუ არა დანაშაულის ნიშნები. ამ მიზნით, გამოსაკითხად დაბარებულია ვლადიმერ ბედუკაძე", - აცხადებენ პროკურატურაში.
აღნიშნულ საქმეზე, დღესვე პროკურატურაში დაიკითხა ჟურნალისტი ელისო კილაძეც.
