ახლა არის იმის შანსი, რომ კურსი დასტაბილურდეს, მაგრამ ეს თავისთავად არ მოხდება. ამისათვის ეროვნული ბანკისა და მთავრობის შეთანხმებული მოქმედებაა აუცილებელი, - განუცახადა „ჯი-ეიჩ-ენს“ ეკონომიკის ექსპერტმა დემურ გიორხელიძემ.
გიორხელიძის თქმით, ლარის კურის თავისთავად დასტაბილურების მოლოდინი ნულის ტოლია.
"მათ უნდა აირჩიონ სწორი, კარგად გააზრებული პოლიტიკა. ჯერჯერობით ჩვენ მხოლოდ განცხადებებს ვხედავთ და მეტს არაფერს. მოლოდინი იმისა, რომ კურსი თავისთავად დასტაბილურდება, ნულის ტოლია, მაგრამ მთავრობასა და ეროვნულ ბანკს შორის კოორდინირებული ღონისძიებებით, კურსის დროებითი სტაბილიზაცია შესაძლებელია”, - განაცხადა გიორხელიძემ.
დემურ გიორხელიძე რეფინანსირების სესხებსაც შეეხო და იმ გზებზე ისაუბრა, რომლებითაც, მისი თქმით, ეკონომიკაში ფული უნდა გაჩნდეს.
"ლარზე ზეწოლა უნდა მოიხსნას და შემცირდეს ის პოლიტიკა, რომლის მიხედვითაც რეფინანსირების სესხებით ბანკები დამატებით ზეწოლას ახდენდენ. საჭიროა, იმპორტჩამნაცვლებელი წარმოების განვითარება. 150-200 მილიონის გაჩენა ეკონომიკაში პირველი დადებითი მოვლენა იქნება. ამისათვის ათასნაირი გზაა- არა მხოლოდ ინვესტიციებით, არამედ შიდა წრეებიდანაც. ვგულისხმობ იმას, რომ ფული პროდუქციის წარმოებაში უნდა გაეშვას და ხელფასები გაიცეს. ეს არის ფული, რომელიც შედეგს იძლევა და არა სპეკულაცია და უძრავი ქონების სესხი", - აღნიშნა გიორხელიძემ.
ეკონომიკის ექსპერტი ეროვნული ბანკის დირექტორის, გიორგი ქადაგიძის, განცხადებასაც გამოეხმაურა, რომლის მიხედვითაც, ეროვნული ბანკი, საჭიროების შემთხევვაში, სავალუტო რეზერვებს გამოიყენებს.
"ერთიანი პოლიტიკის ფარგლებში, რეზერვების გონივრულად გამოყენება სრულიად ნორმალური, სტანდარტული ხერხია და ამაზე უარი არ უნდა თქვა, მაგრამ მხოლოდ რეზერვების ხარჯზე კურსი, ცხადია, ვერ დასტაბილურდება. აქამდე მათი პოლიტიკა არასწორი იყო და შედეგი სახეზეა. ახლა ძველებურად იმ უბრალო მიზეზის გამო ვეღარ გააგრძელებენ, რომ ყველაფერი საშიშ ზღვარზეა. თუ დევალვაციის ეფექტი ინფლაციურ პროცესებში გადაიზრდება, ლარის ვარდნის გაგრძელება ეკონომიკას კიდევ უფრო მეტად შეავიწროებს და ამის შეჩერება რთული იქნება”, - განაცხადა დემურ გიორხელიძემ.
მისი თქმით, ადრე ლარის გამყარების არანაირი საფუძველი არ არსებობდა და ასეც აღმოჩნდა,
„ახლა ვამბობ- კოორდინირებული მოქმედებით შეიძლება სტაბილიზაცია, დროის მოგება და შემდეგ უკვე სერიოზული ნაბიჯების გადადგმა კურსის კიდევ უფრო მეტად გასამყარებლად. ამის საშუალება არის და უნდა გამოიყენონ", - განაცხადა ექსპერტმა.
შეგახსენებთ, რომ დღეს ეროვნლმა ბანკმა სავალუტო აუქციონზე გასაყიდად 40 მილიონი აშშ დოლარი გამოიტანა. ლარის კურსი კი 4 თეთრით გამყარდა.
