უკრაინაში ახალი, რევოლუციური ეტაპი იწყება. ამის შესახებ რადიკალური ნაციონალისტური დაჯგუფების, “მემარჯვენე სექტორის” ლიდერმა დიმიტრი იაროშმა კიევში გამართულ მიტინგზე განაცხადა, რომელსაც რამდენიმე ათასი მისი მხარდამჭერი ესწრებოდა. აქციის მონაწილეებმა ხელისუფლება ქვეყნის ღალატში დაადანაშაულეს და პრეზიდენტისა და მთავრობის გადადგომა მოითხოვეს. დაჯგუფების ლიდერმა კიდევ ერთხელ აღნიშნა, რომ ხელისუფლების წინააღმდეგ ბრძოლა უკიდურესად მშვიდობიანი იქნება და სახელმწიფო გადატრიალების მოწყობა “მემარჯვენე სექტორის” გეგმებში არ შედის. მისივე თქმით, უკრაინაში საყოველთაო რეფერენდუმი უნდა ჩატარდეს, რომელზეც მოქმედი ხელისუფლების ნდობის საკითხი დადგება. “მემარჯვენე სექტორი” ასევე უარს აცხადებს 25 ოქტომბერს დაგეგმილ ადგილობრივ არჩევნებში მონაწილეობაზე.
