საქართველოს საპარტნიორო ფონდმა კიდევ ერთი პროექტი განახორციელა, რომლის ფარგლებშიც რუსთავის გზატკლეცილზე, ადგილობრივ კომპანია ICES -თან თანამშრომლობით ე.წ. სენდვიჩ პანელების საწარმო გახსნა. მის გახსნას საპარტნიორო ფონდის ხელმძღვანელებთან და ბიზნესმენებთან ერთად საქართველოს პრემიერ-მინისტრი და მთავრობის წევრებიც ესწრებოდნენ.
როგორც საპარტნიორო ფონდის აღმასრულებელმა დირექტორმა ირაკლი კოვზანაძემ განაცხადა, სამშენებლო სექტორისთვის ეს დიდი დახმარებაა, რადგან იგი გააიაფებს ინდუსტრიული მშენებლობის ხარჯებს.
”უფრო კონკრეტულად, საქართველოში წარმოებული პროდუქცია ჩაანაცვლებს იმპორტს და შესაბამისად, სამშენებლო კომპანიებს შეუმცირდებათ დანახარჯები. ეს კი უკვე შემდგომში, ამ კომპანიების მიერ წარმოებული პროდუქციის ფასებზე დადებითად აისახება", - განაცხადა ირაკლი კოვზანაძემ.
პრემიერ-მინისტრის განმარტებით, ასეთი სამშენებლო მასალის წარმოება მნიშვნელოვანი სიახლეა, მით უმეტეს, რომ 2014 წელს ქვეყანაში სამშენებლო სექტორი 26 %-ით გაიზარდა.
”დარწმუნებული ვარ, დიდ დახმარებას გაუწევს ჩვენს სამშენებლო სექტორს. ჩვენს მშენებლებს არ მოუწევთ უცხოეთიდან პროდუქციის შემოტანა. პროდუქცია ასევე გავა ექსპორტზე ყაზახეთში, აზერბაიჯანში, უკრაინასა და რუსეთში. ჩვენ ერთის მხრივ უნდა მოვახდინოთ ადგილობრივი ბაზრის დაკმაყოფილება, ასევე მეორეს მხრივ გავიდეთ ექსპორტზე",- აღნიშნა პრემიერმა.
საპარტნიორო ფონდის ინფორმაციით, პროდუქცია რკინა-ბეტონის კონსტრუქციაზე იაფია, ხოლო მისი დამონტაჟება ნაკლებ დროს მოითხოვს და სხვა სამშენებლო მასალებთან შედარებით მოცულობაში ნაკლებია.
საწარმო რუსთავის გზატკეცილზე აშენდა და თანამედროვე იტალიური დანადგარებით აღიჭურვა. პროდუქციის 60 პროცენტი საქართველოში გაიყიდება, ხოლო დარჩენილი ნაწილი ექსპორტზე გავა - ყაზახეთში, აზერბაიჯანში, უკრაინასა და რუსეთში. საწარმოო ხაზის დაგეგმილი სიმძლავრე წელიწადში 2.8 მლნ მ2 პანელია.
საპარტნიორო ფონდის ხელმძღვანელი აცხადებს, რომ წარმოებული პროდუქციის 55 % საქართველოში დარჩება და თურქული იმპორტი ჩანაცვდება, ხოლო დარჩენილი 45 %-ი კი არსებული ხელშეკრულებებით ექსპორტირებული იქნება სომხეთში, ყაზახეთში, აზერბაიჯანში.
”ჩვენი ამოცანა გახლდათ ასევე ისიც, რომ გარკვეულწილად გაგვეიაფებინა სამშენებლო ინდუსტრია და ეს არის 30 %-ით იაფი პროდუქცია, ვიდრე იმპორტირებული ანალოგიური პროდუქტი”,- აღნიშნა ირაკლი კოვზანაძემ.
პროექტზე მუშაობა საპარტნიორო ფონდმა ადგილობრივ კომპანია შპს " ICES"-თან ერთად გასული წლის მარტში დაიწყო. ინვესტიციის მთლიანი მოცულობა 6 მლნ აშშ დოლარია. ფონდის მონაწილეობა პროექტში 49%-ია.
