ფინანსთა მინისტრმა ნოდარ ხადურმა „2030“-ის ეთერში ბიუჯეტში ცვლილებების მიზეზები ჩამოთვალა. მისი თქმით, ბიუჯეტის კორექტირება ეკონომიკური ზრდის მაჩვენებელმა და სტიქიით მიყენებულმა ზარალმა გამოიწვია.
„რამ გამოიწვია ცვლილებები: თებერვლიდან ვსაუბრობთ იმაზე, რომ ეკონომიკური ზრდის პროგნოზი რეგიონში და მსოფლიოში მიმდინარე ეკონომიკური პროცესების გათვალისწინებით ვერ იქნებოდა 5%, და ჩვენ შევთანხმდით, რომ დაახლოებით 2% ეკონომიკურ ზრდას უნდა ველოდოთ. ეს იყო პირველი მიზეზი იმისა, რომ ჩვენ უნდა გაგვეხორციელებინა ცვლილებები ბიუჯეტში. მაგრამ მას შემდეგ, რაც ჩვენ პრაქტიკულად მზად გვქონდა ბიუჯეტის პროექტი, 13-14 ივნისს სტიქიური უბედურების შედეგად ჩვენ მივიღეთ ძალიან სერიოზული პრობლემები“, - განაცხადა მინისტრმა.
