საქართველოს სასჯელაღსრულების სამინისტრო ადასტურებს, რომ ე.წ. კორტების სპეცოპერაციის საქმეზე ბრალდებული 7 ყოფილი სპეცრაზმელი ერთ საკანშია მოთავსებული. რიგითი სპეცრაზმელების ცალკე საქმედ გამოყოფის შემდეგ მათი ერთ საკანში განთავსების შესახებ ინფორმაცია "ინტერპრესნიუსმა" გაავრცელა.
ამასთან, რიგითების პროკურორი ამირან გულუაშვილი აცხადებს, რომ ერთ საქმეზე ბრალდებული პატიმრების მოთავსება ერთ საკანში, როგორც წესი არ ხდება. მისი განმარტებით, იგი არ ფლობს ინფორმაციას პატიმრების ერთ საკანში განთავსებასთან დაკავშირებით.
"ინფორმაცია ჩემთვის უცნობია, თუმცა ეს არის სასჯელაღსრულების დეპარტამენტის კომპეტენცია. პატიმართა განაწილება და მათი მოთავსება საკნებში წარმოადგენს სწორედ სად-ის კომპეტენციას. პროკურატურის კომპეტენცია მათ განაწილებაზე არ ვრცელდება. არანაირი ინფორმაცია იმის შესახებ, თუ რა პირობებში არიან ეს ბრალდებულები, არ გაგვაჩნია", - განაცხადა პროკურორმა.
შეეკითხვაზე - ბრალდებულების ერთად განთავსება მიუთითებს თუ არა, რომ მათ მიმართ რაიმე შემამსუბუქებელი ღონისძიება იგეგმება, პროკურორმა ხაზგასმით აღნიშნა, რომ კანონით, საპროცესო შეთანხმების უფლება ყველა სისხლის სამართლის საქმეზეა შესაძლებელი, თუმცა დღეის მდგომარეობით, კონკრეტულად შვიდი რიგითი სპეცრაზმელის საქმეზე რაიმე სახის შემამსუბუქებელი ღონისძიების ირგვლივ მოლაპარაკებები არ მიმდინარეობს.
თბილისის საქალაქო სასამართლოში ე.წ. კორტების სპეცოპერაციის საქმეზე ბრალდებული რიგითი სპეცრაზმელების წინასასამართლო სხდომა მიმდინარეობს, სადაც პროკურატურამ მტკიცებულებათა ნუსხა წარადგინა.
როგორც ცნობილია, დაცვის მხარე წარდგენილი მტკიცებულებების დიდ ნაწილს სადაოდ არ გახდის. შესაბამისად, არსებითი განხილვის პირობებში ბრალდების მხარის მტკიცებულებების დიდი ნაწილის გამოკვლევა არ მოხდება.
ამასთან, მას შემდეგ, რაც კორტების სპეცოპერაციის საქმეზე დაკავებულთა საქმიდან რიგითი სპეცრაზმელების საქმე გამოიყო, ვრცელდება ინფორმაცია, რომ მათთან შესაძლოა, საპროცესო შეთანხმება გაფორმდეს.
