საქართველოს პრეზიდენტი გიორგი მარგველაშვილი პოლიციელებს ქალთა მიმართ ძალადობის წინააღმდეგ უფრო აქტიური ბრძოლისკენ მოუწოდებს. ქუთაისში, პოლიციის დღისადმი მიძღვნილ ღონისძიებაზე სიტყვით გამოსვლისას მან განაცხადა, რომ ის სტატისტიკა, რომელიც აღნიშნულ დანაშაულთან დაკავშირებით, საქართველოში 2014 წელს იყო, არასოდეს განმეორდება.
"მე მინდა, ხაზი გავუსვა ერთ სერიოზულ პრობლემას, რომელიც არამარტო პოლიციას, არამედ მთელ საზოგადოებას გვიპირისპირდება. 2014 წელი იყო ქალთა მიმართ განსაკუთრებული ძალადობის წელი. ჩვენ ამის ახსნა გვიჭირს დღეს, იმიტომ, რომ ეს არ არის ჩვენს ბუნებაში, ეს არ არის ჩვენს საზოგადოებაში. მაგრამ მე მჯერა, რომ პოლიციელები კიდევ უფრო პროფესიონალურად, ფსიქოლოგიის და სხვა ბევრი დეტალის კარგი ცოდნით, შეძლებენ და ამ უმძიმეს დანაშაულს კიდევ უფრო აქტიურად შეებრძოლებიან. ამიტომ 2015 წელი მე გამოვაცხადე ქალთა წლად და დარწმუნებული ვარ, ის კატასტროფული სტატისტიკა, რაც 2014 წელს გვქონდა, წელს აღარ განმეორდება", - განაცხადა პრეზიდენტმა.
გიორგი მარგველაშვილმა პოლიციელებს, ქვეყნისთვის გაწეული სამსახურისთვის, მადლობა გადაუხადა.
