საქართველოს პრეზიდენტი გიორგი მარგველაშვილი ექსპრეზიდენტ მიხეილ სააკაშვილის მიერ საქართველოს მოქალაქეობის დატოვებას ნეგატიურად აფასებს. როგორც მან ჟურნალისტებთან განაცხადა, ამით სააკაშვილმა შეურაცხყოფა მიაყენა ქვეყანას და პრეზიდენტის ინსტიტუტს.
"ნეგატიურად მინდა გამოვხატო ჩემი დამოკიდებულება. ყოფილ პრეზიდენტს არ უნდა დაეტოვებინა საქართველოს მოქალაქეობა. ამით მან შეურაცხყოფა მიაყენა ქვეყანას და პრეზიდენტის ინსტიტუტს. ჩემი აზრით, კარიერაზე უფრო მნიშვნელოვანი არის ღირებულებები და ეს ღირებულებები არის საქართველოს მოქალაქეობა. ჩემთვის გაუგებარია მისი ეს საქციელი", - აღნიშნა პრეზიდენტმა.
შეგახსენებთ, მიხეილ სააკაშვილს უკრაინის მოქალაქეობა მიენიჭა. "საქართველოს მოქალაქეობის შესახებ კანონის" თანახმად, საქართველოს მოქალაქეობას დაკარგავს პირი, თუ იგი სხვა ქვეყნის მოქალაქეობას მოიპოვებს.
