კონსტიტუციონალისტი ვახუშტი მენაბდე, საკონსტიტუციო სასამართლოს მიერ მაჟორიტარულ ოლქებთან დაკავშირებით გამოტანილ გადაწყვეტილებას, პოლიტიკური მნიშვნელობის გადაწყვეტილებად აფასებს.
"სასამართლომ განაცხადა, რომ ის მაჟორიტარული ოლქები, რომლებიც დღეს არსებობენ და რომლის შედეგადაც დაკომპლექტებულია დღევანდელი პარლამენტი, არის არაკონსტიტუციური. 2016 წლის არჩევნებისთვის ჩვენ გვექნება რეალობა, რომლის მიხედვითაც, უნდა დაიშალოს არსებული საარჩევნო ოლქები და უნდა განაწილდეს ხელახლა, რაც გულისხმობს იმას, რომ პატარა ოლქები გამსხვილდებიან, ხოლო დიდები დანაწილდებიან. მაგალითად, საბურთალოს ეყოლება, არა ერთი არამედ ოთხი მაჟორიტარი. თუმცა, რა თქმა უნდა, შესაძლებელია, რომ ერთი მაჟორიტარული ოლქი აღარ იყოს და იყოს მრავალმანდანტიანი მაჟორიტარული ოლქები", - განაცხადა ვახუშტი მენაბდემ.
მისივე თქმით, სასამართლოს ამ გადაწყვეტილების შემდეგ პარლამენტმა ახლა უნდა შეცვალოს საარჩევნო კოდექსი და უნდა მოიყვანოს კონსტიტუციასთან შესაბამისობაში.
ერთმანდანტიანი მაჟორიტარული ოლქების განსაზღვრის წესი საკონსტიტუციო სასამართლომ არაკონსტიტუციურად ცნო.