საქართველოს საკონსტიტუციო სასამართლომ დააკმაყოფილა უჩა ნანუაშვილისა და მიხეილ შარაშიძის სარჩელი საქართველოს პარლამენტის წინააღმდეგ.
დავის საგანს წარმოადგენდა საარჩევნო კოდექსის ის ნორმები, რომელიც განსაზღვრავდა, რომ საპარლამენტო არჩევნებისთვის თითოეული მუნიციპალიტეტი, გარდა თბილისისა, წარმოადგენდა ერთმანდატიან მაჟორიტარულ საარჩევნო ოლქს.
გადაწყვეტილების თანახმად, მაჟორიტარის არჩევისას გათვალისწინებული უნდა იყოს ამომრჩეველთა და მაჟორიტარების პროპორციული რაოდენობა.
საკონსტიტუციო სასამართლოს უფროსმა მრჩეველმა გიორგი სულხანიშვილმა განაცხადა, რომ სასამართლომ ძალადაკარგულად სცნო კონკრეტული სადავო ნორმები და წესები, რაც წინააღმდეგობაში მოდიოდა საქართველოს კონსტიტუციის მე-14-ე მუხლთან (რითაც კანონის წინაშე ყველას თანასწორობის პრიცნიპია გათვალისწინებული) და 28-ე მუხლთან (რითაც გათვალისწინებულია მოქალაქეების საარჩევნო უფლება).
