საქართველოს პრეზიდენტის მიერ, ხელისუფლების წარმომადგენლებისათვის კონსტიტუციის გადაცემასთან დაკავშირებით, კომენტარს მისი მრჩეველი კახა კოჟორიძე აკეთებს და აცხადებს, რომ ამას მხოლოდ სიმბოლური დატვირთვა ჰქონდა.
როგორც კოჟორიძემ აღნიშნა, საქართველოს დამოუკიდებლობის დღეს სახელმწიფოს მეთაურმა საკანონმდებლო, აღმასრულებელი და სასამართლო ხელისუფლების მესვეურებს გაუგზავნა ქვეყნის უმაღლესი საკანონმდებლო ნორმატიული აქტის ძალიან მაღალი ხარისხის გამოცემა.
კითხვაზე - ხომ არ გააკეთა ეს პრეზიდენტმა იმის გამო, რომ ხშირად ხდება პრეზიდენტის ინსტიტუტის დაკნინება, კოჟორიძემ განაცხადა, რომ ტავისი პოზიციის დაფიქსირება პრეზიდენტს არ უჭირს.
,,მე ვფიქრობ, პრეზიდენტს ნამდვილად არ უჭირს ამის პირდაპირ თქმა, როდესაც რაიმე არასწორი ხდება. ამ ფორმით ამას არ იტყოდა, შესაბამისად, ამის ერთადერთი დანიშნულება იყო საქართველოს დამოუკიდებლობის დღეს სიმბოლური საჩუქრის გაკეთება ხელისუფლების უმაღლესი თანამდებობის პირებისთვის", - განაცხადა კახა კოჟორიძემ.
საქართველოს პრეზიდენტმა გიორგი მარგველაშვილმა დამოუკიდებლობის დღესთან დაკავშირებით დეპუტატებს, მთავრობის წევრებსა და სასამართლოს წარმომადგენლებს კონსტიტუცია უსახსოვრა. პრეზიდენტის საჩუქარი პარლამენტის და მთავრობის წევრებს, ასევე უზენაესი და საკონსტიტუციო სასამართლოს წარმომადგენლებს გუშინ გადაეგზავნათ.